Qazaqstanda azamattyq qoǵamǵa qashan da jiti kóńil bólinip keldi, bolashaqta da solaı bola bermek - ІV Azamattyq forým

A.  Qarashanyń 24-i. QazAqparat /Aıdar Ospanálıev/ - «Qazaqstanda azamattyq qoǵamǵa qashan da jiti kóńil bólinip keldi jáne bolashaqta da solaı bola bermek». Bul Memleket basshysynyń Azamattyq forýmǵa qatysýshylarǵa joldaǵan sózi, dedi búgin Memlekettik hatshy-Syrtqy  ister  mınıstri  Qanat Saýdabaev  ІV Azamattyq forýmda.

Onyń aıtýynsha, el táýelsizdigin alǵaly azamattyq qoǵamdy damytý eldiń ishki saıasatynyń basym baǵyty bolyp keldi. «Búginde elimizde 25 myńnan astam kommertsııalyq emes uıymdar jumys isteıtin bolsa, sonyń 13 myńnan astamy - úkimettik emes uıymdar. Atalmysh uıymdar sany tek bıylǵy jyldyń ózinde 10 paıyzǵa ósti. Jáne 550 myńnan astam adam osy saladaǵy qyzmetke qamtyldy. Aǵymdaǵy jyly azamattyq qoǵamdy damytý tujyrymdamasynyń birinshi kezeńi aıaqtalady», dedi Memlekettik hatshy.

 Q. Saýdabaev  forýmnyń jumysy jolǵa qoıylǵaly úshinshi sektordy qarjylandyrý kólemi de ulǵaıǵanyn atap  ótti. Álemdegi ekonomıkalyq kúrdeli jaǵdaıǵa qaramastan,  tek bıylǵy jyly ǵana Memleket basshysynyń tapsyrmasymen áleýmettik tapsyrystardy júzege asyrýǵa 1,2 mlrd. teńge qarastyrylyp otyr. Bul ótken 2008 jylǵy kórsetkishpen salystyrǵanda 45 paıyzǵa joǵary», dedi ol.