Qazaqstanda aınalymnan 1 tonnadan astam esirtki zaty alyndy

ASTANA. QazAqparat – «Qarasora» operatsııasy barysynda 233 esirtki qylmysy áshkerelendi. Bul týraly Іshki ister mınıstrligi baspasóz qyzmetiniń ókili Shuǵyla Turlybek málim, etti, dep habarlaıdy QazAqparat tilshisi.

«Elimizdiń ońtústik óńirlerinde qarasorany ósirýge, daıyndaýǵa jáne áketýge qarsy is-qımylǵa, sondaı-aq esirtkini, onyń ishinde olardyń jańa túrlerin taratýǵa mamandanǵan uıymdasqan qylmystyq toptardyń qyzmetine jol bermeýge baǵyttalǵan «Qarasora» arnaıy operatsııasy jalǵasýda. Іs-sharalarǵa ІІM, Ulttyq ulan, Qorǵanys mınıstrliginiń arnaıy bólimsheleri jumyldyryldy. Áýeden barlaý úshin ushqyshsyz ushý apparattary qoldanylady», - dedi ol mınıstrliktiń baspasóz qyzmeti alańynda ótken aptalyq brıfıngte.

Shuǵyla Turlybektiń dereginshe, «Qarasora» arnaıy operatsııasynyń bir aıynda polıtseıler 233 qylmysty anyqtady.

«Onyń ishinde 87-si satý faktisi, asa iri mólsherde esirtkini zańsyz saqtaýdyń 33, quramynda esirtki bar ósimdikterdi ósirýdiń 86 faktisi, 4 esirtki zerthanasy anyqtaldy. Zańsyz aınalymnan bir tonnadan astam esirtki, onyń ishinde 642 keli marıhýana, 29 keli gashısh, 4 keli sıntetıka jáne shamamen 1 keli geroın tárkilendi», - dedi mınıstrlik ókili.