Qazaqstanda aılyq jalaqynyń ortasha mólsheri belgilendi

NUR-SULTAN. QazAqparat - Qazaqstanda 2019 jyldyń qańtar-naýryz aılarynda bir qyzmetkerdiń ortasha aılyq jalaqysy 168 489 teńgeni qurady, dep habarlaıdy «QazAqparat» HAA tilshisi QR Ulttyq ekonomıka mınıstrliginiń Statıstıka komıtetine silteme jasap.

Aǵymdaǵy jyldyń birinshi toqsanynda 2018 jyldyń sáıkes kezeńimen salystyrǵanda ortasha aılyq jalaqy 10,5% , naqty kórsetkishte - 5,2% ósti.

Sonymen qatar, salalyq qurylymda eń joǵary ataýly jalaqy ken óndirý ónerkásibi men karerlerdi qazýda - 401,1 myń teńge (bul ortasha respýblıkalyq deńgeıden 2,4 ese joǵary), qarjy jáne saqtandyrý qyzmetinde - 323 myń teńge (1, 9 ese), kásibı, ǵylymı jáne tehnıkalyq qyzmet salasynda - 296,3 myń teńge (1,8 ese), aqparat jáne baılanys salasynda - 253 myń teńge (1,5 ese), kólik jáne qoımalaý - 218,2 myń teńge (1,3 ese).

Ataýly jalaqynyń eń tómengi deńgeıi aýyl sharýashylyǵynda, orman jáne balyq sharýashylyǵynda tirkeldi - 93,2 myń teńge, bul ortasha respýblıkalyq kórsetkishten 44,7% tómen.

Aımaqtyq turǵyda eń joǵary ataýly jalaqy Atyraý oblysynda tirkeldi - 322,7 myń teńge, bul respýblıkalyq ortasha kórsetkishten 1,9 ese joǵary. Túrkistan aımaǵynda onyń quny 109 myń teńgeni qurap, respýblıkalyq ortasha kórsetkishten 35,3% tómen boldy.