Qazaqstanda áıelder kásipkerligin qoldaý ortalyqtary iske qosyldy

ALMATY. QazAqparat - Digital Almaty halyqaralyq forýmy aıasynda «Áıelderdiń áleýmettik-ekonomıkalyq jaǵdaıyn jaqsartý maqsatynda tsıfrlandyrý» taqyrybynda dóńgelek ústel otyrysy ótti, dep habarlaıdy QazAqparat tilshisi.

Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Ramazanova Qazaqstanda áıelder kásipkerligi belsendi damyp kele jatqanyn, alaıda onyń edáýir bóligi usaq jáne shaǵyn bıznes segmentinde shoǵyrlanǵanyn atap ótti.

«Ulttyq komıssııa sheńberinde Qazaqstannyń ár oblysynda áıelder kásipkerligin qoldaý ortalyqtaryn ashý jobasy pılottyq rejımde iske qosyldy. Bul biregeı joba, sol sebepti kásipkerlik kodeksinde «áıelder kásipkerligi» uǵymy bolmasa da, biz osy baǵytta qozǵalamyz. Bul – kásipker áıelderdiń zor eńbegi. Búginge deıin osyndaı 20 ortalyq ashyldy, kórsetilgen qyzmet sany 30 myńnan asady», - dedi ol.
QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov memlekettik qyzmetterdi proaktıvti formatqa kóshirý jumystary qalaı júrip jatqanyn aıtyp berdi. Mundaı keshendi tásildi aldymen, áıelder baǵalaýy kerek.
Vıtse-mınıstr bala kútip otyrǵan áıelderdiń jaǵdaıyn jaqsartýǵa baǵyttalǵan keshendi tásildi bala týý mysalynda túsindirip ótti.
«Bul adamnyń memleketpen tikeleı baılanyspaı-aq kómek pen qoldaýdy sezinetin «kórinbeıtin memleket» qaǵıdaty», - dedi Áset Turysov.
Keshendi taldaý barysynda bolashaq ana sanatyna kirý, dekrettik demalysty rásimdeý, qandaı da bir artyqshylyqtarǵa ıe bolý syndy kóptegen aqparat berildi.
«Qazir barlyq rásimder kóp degende bir saǵat ýaqytty alatyndaı jáne qurylym qyzmetkerlerimen tikeleı baılanyssyz qyzmet kórsetý kesheni pysyqtalýda»,- dep atap ótti vıtse-mınıstr.
Aıta keteıik, Almatyda «Digital Almaty 2023: jańa bolmystaǵy tsıfrlyq áriptestik» halyqaralyq forýmy ótip jatyr.