Qazaqstanda áıelder kásipkerligin damytý boıynsha 17 ortalyq ashylady – Áset Erǵalıev

NUR-SULTAN. QazAqparat - Elordada «Áıelderdiń ekonomıkalyq múmkindikterin keńeıtý sharalary men quraldary» atty respýblıkalyq konferentsııa barysynda QR Ulttyq ekonomıka mınıstri Áset Erǵalıev Qazaqstandaǵy áıelder kásipkerligin damytý týraly baıandady, dep habarlaıdy QazAqparat.

«Bıyldyń ózinde áıelder kásipkerligin damytý boıynsha 17 ortalyq ashylyp, jumys isteı bastaıdy, ıaǵnı elimizdiń ár óńirinde bir-bir Ortalyq bolady», - dedi mınıstr.

Ortalyqtardyń ashylýy QR UEM, «Atameken» UKP jáne QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa arasyndaǵy áıelder kásipkerligin damytý boıynsha áriptestik jáne yntymaqtastyq týraly qol qoıylǵan kelisim sheńberinde kózdelip otyr.

Kelisim áıelderdiń qoǵamdyq-saıası ómirdegi ekonomıkalyq múmkindigin keńeıtýdi qarastyrady. Qujat áıel kásipkerligin damytý, oqytý, kooperatsııa jáne qajetti quzyretterdi qalyptastyrý arqyly olardyń ekonomıkalyq belsendiligin yntalandyrý, sondaı-aq bıznesti qoldaý baǵdarlamalary sheńberinde jeńildikti kredıtter men granttar berý, áıelderdiń jumyspen qamtylýyn qamtamasyz etý, áıelder men olardyń uıymdary óndirgen taýarlar men qyzmetterdi ótkizý naryqtaryn damytýǵa járdemdesý máseleleri boıynsha taraptardyń ózara is-qımylyn kózdeıdi.

Á. Erǵalıevtiń aıtýynsha, Mınıstrlik qurylyp jatqan ortalyqtar alańynda áıelder kásipkerligin damytý boıynsha tıimdi sharalardy ázirleý úshin ákimdikter men damý ınstıtýttary janynda jumys istep jatqan áıelderdi qoldaý ortalyqtary men qyzmetteriniń jumysyn belsendi zertteýde.

«Ortalyqtar áıelderdiń kásipkerlik bastamasynyń áleýetin iske asyrýǵa qýatty serpin bere otyryp, áıelderdi aqparattyq jáne konsýltatsııalyq qoldaýdyń negizgi kózine aınalady. Áıelderdiń ekonomıkadaǵy róliniń kúsheıýi ekonomıkalyq ósý men qoǵamnyń damýyna yqpal etetinine senimdimin», - dedi ol.

Bıznesti qoldaý jónindegi memlekettik baǵdarlamalar monıtorınginiń derekteri boıynsha memleketten qarjylaı qoldaý alatyn kásipker áıelderdiń úlesi shamamen 32%-ti quraıdy. Bul jeńildetilgen banktik kredıtteý jáne granttar berý. Qarjylaı emes qoldaý jobalarynyń jartysyna jýyǵy (45%) – áıel-kásipkerlerdiń qatysýymen iske asyrylady.

Ulttyq ekonomıka mınıstrligi men EQQDB arasyndaǵy yntymaqtastyq sheńberinde 300-ge jýyq kásipker áıel jergilikti konsýltanttardan konsýltatsııalyq kómek aldy, 35,4 mlrd.teńge somasynda 21,8 myń kredıt berildi.

Óz baıandamasynyń sońynda Áset Erǵalıev kásipker áıelderge atqarǵan jumystary úshin alǵys aıtyp, aldaǵy merekemen quttyqtady.