Qazaqstanda áıel zorlaýǵa oqtalǵandardy jazalaıtyn zań joq – Dına Smaılova

TALDYQORǴAN.QazAqparat - Qazaqstanda zorlyq jasaǵysy kelgenderdi jazalaıtyn zań joq. Sol sebepti «Ne molchı» qorynyń jetekshisi Dına Smaılova zańǵa ózgeris engizý kerektigin aıtady, dep habarlaıdy QazAqparat tilshisi.

Dına Smaılova Qaskeleńde Ózbekstan azamaty oqýshy qyzǵa tap bergen oqıǵaǵa qatysty pikir bildirdi.

«Meniń oıymsha, bul adam pedofıl. Oılańyzdarshy, arqasynda sómkesi bar oqýshydan ne alýǵa bolady? Tonaıtyn nesi bar onyń? Ókinishke qaraı, bizdiń elde zorlyq jasaǵysy kelgenderdi jazalaıtyn zań joq. Sondyqtan pedofıldiń áreketin dáleldep shyǵý óte qıyn. Sol sebepti, zańǵa ózgeris engizý kerek. Ustalǵan adam Ózbekstan azamaty bolǵandyqtan, kóshi-qon tártibin buzǵandyqtan 30 táýlikke qamaldy. Eger jergilikti turǵyn bolsa, ol bostandyqta júretin edi. Mundaı adamdar qoǵamǵa óte qaýipti», - deıdi «Ne molchı» qorynyń jetekshisi Dına Smaılova.

Esterińizge kele keteıik, Almaty oblysynda Ózbekstan azamaty tapa-tal túste oqýshy qyzǵa tap bergenin habarlaǵan bolatynbyz.