Qazaqstanda «Aıbalta-2022» strategııalyq komandalyq-shtabtyq oqý-jattyǵýy ótip jatyr

ASTANA. QazAqparat – Qazaqstannyń shyǵys, batys, ortalyq jáne ońtústik óńirlerindegi polıgondarda ótkizilip jatqan «Aıbalta-2022» oqý-jattyǵýyna barlyq ásker túrleri men tekteriniń bólimsheleri, sondaı-aq Ujymdyq Qaýipsizdik týraly shart uıymy (UQShU) ujymdyq Jedel den qoıý kúshteriniń kontıngenti jumyldyrylǵan, dep habarlaıdy QazAqparat.

QR Qorǵanys mınıstrliginiń habarlaýynsha, birinshi kezeńde bas qolbasshylar men qolbasshylardyń basshylyǵymen soǵys ýaqytynda áskerlerdi qoldanýdyń oqý josparlary naqtylandy. Aýmaqtyq qorǵanys bólimsheleriniń qatysýymen áskerı mindettilerdi shaqyrý arqyly jumyldyrý jáne taktıkalyq-arnaıy oqý-jattyǵýlary ótkizilip, vedomstvoaralyq ózara is-qımyl máseleleri pysyqtaldy.

2022 jylǵy 26 qyrkúıek pen 8 qazan aralyǵyna josparlanǵan ekinshi kezeńde «Aıbalta-2022» strategııalyq oqý-jattyǵýy sheńberinde Qazaqstanda birqatar jedel-taktıkalyq, taktıkalyq, taktıkalyq-arnaıy, ushý-taktıkalyq jáne arnaıy oqý-jattyǵýlary ótkiziledi. Bas qolbasshylar men qolbasshylar qabyldaǵan sheshimderdiń negizinde birinshi kezeń barysynda áskerler oqý-jaýyngerlik tapsyrmalardy oryndaýy qajet.

Onyń ishinde Ujymdyq qaýipsizdik týraly shart uıymynyń «Ózara is-qımyl», «Іzdeý» jáne «Eshelon» oqý-jattyǵýlary da bar. Bul birlesken manevrler UQShU-nyń Qorǵanys mınıstrleri keńesi men Qaýipsizdik keńesteri hatshylary komıtetiniń 2018 jylǵy 8 qarashadaǵy sheshimine sáıkes, Uıymǵa múshe elderdiń biriniń aýmaǵynda jyl saıyn ótkizilip turady.

«Eshelon-2022» arnaıy oqý-jattyǵýynda áskerlerdi materıaldyq-tehnıkalyq qamtamasyz etý máseleleri pysyqtalatyn bolady. Oqý-jattyǵýdyń birqatar elementteriniń jumys isteýi, oǵan qosa temirjol kóligimen tasymaldaý, janar-jaǵarmaı quıý jáne oq-dárilerdi jetkizý, dala jaǵdaıynda qarý-jaraq pen tehnıkany jóndeý, zattaı, azyq-túlik jáne medıtsınalyq qamtamasyz etý uıymdastyrylady.

«Іzdeý-2022» arnaıy oqý-jattyǵýy Uıymǵa múshe memleketter barlaý organdarynyń kúshteri men quraldarymen barlaýdy uıymdastyrý jáne júrgizý boıynsha oqý-jaýyngerlik mindetterdi oryndaýǵa baǵyttalǵan.

«Ózara is-qımyl-2022» komandalyq-shtabtyq oqý-jattyǵýy Ujymdyq qaýipsizdiktiń Ortalyq Azııa óńirindegi qarýly qaqtyǵysty oqshaýlaý boıynsha birlesken operatsııalaryn daıyndaý men olardy ótkizý máselelerin pysyqtaýdy kózdeıdi.