Qazaqstanda avtomobıl joldarynyń 97 paıyzy tasqyn sýdy ótkizýge daıyn

NUR-SULTAN. QazAqparat - Jol qyzmetteri naýryz aıynyń basynan beri respýblıkalyq mańyzy bar avtomobıl joldaryn kún saıyn patrýldeýde, dep habarlaıdy QazAqparat Indýstrııa jáne ınfraqurylymdyq damý mınıstrligine silteme jasap.

Osy rette sý basý qaýpi bar 288 jol ýchaskesi, 52 kópir men 717 sý ótkizý qubyry baqylaýǵa alyndy. Ásirese, sý basý qaýpi tónip turǵan Aqmola, Shyǵys Qazaqstan, Qaraǵandy, Pavlodar, Qostanaı jáne Soltústik Qazaqstan sııaqty 6 oblystyń joldaryna erekshe kóńil bólingen.

«Máselen, Aqmola oblysynda avtomobıl joldarynyń 53 ýchaskesi, 114 qubyr, 18 kópir erekshe baqylaýda. Budan bólek, 688 qubyrdy ashý jumystary aıaqtalǵan. Mamandar «Vıacheslav sý qoımasyna kireberistiń» (14 shaqyrym) jáne «Makınsk-Aqsý-Torǵaı» (189 shaqyrym) jolynyń boıyndaǵy 2 bógetke kún saıyn baqylaý júrgizedi. Munda joldar sý astynda qalýy múmkin degen qaýip bar. 2400 qubyrdy ashý jumystary tolyqtaı aıaqtalǵan. Qaraǵandy oblysynda joldardyń 39 ýchaskesi, 400 qubyr men 16 kópir baqylaýǵa alyndy. Jol qyzmetteri 1300-den astam sý ótkizý qubyryn ashý jumystaryn júrgizdi. Budan bólek, uzyndyǵy 871 shaqyrymdy quraıtyn respýblıkalyq mańyzǵa ıe «Qyzylorda – Pavlodar» jolynan 8 shaqyrym jerde ornalasqan Sherýbaı-Nura sý qoımasynyń bógeti jolshylardyń kúndelikti baqylaýynda. Munda 2019 jyly joldyń 164-167 shaqyrymyn kúrdeli jóndeýden ótkizýdiń nátıjesinde sý tasqynynyń saldary joıylǵanyn aıta ketý kerek» delingen habarlamada.

Sondaı-aq, jol qyzmetteri Qostanaı oblysyndaǵy avtomobıl joldarynyń 31 ýchaskesin jáne 13 qubyrdy baqylaýda. Munda 675 qubyrdy ashý jumystary tolyqtaı aıaqtalǵan. Sý tasqynyn boldyrmaý maqsatynda ótken jyly «Ekaterınbýrg – Almaty» jolynyń 714-716 shaqyrymynda kópir salynyp, joldyń 3 ýchaskesinde qosymsha sý ótkizý qubyrlary ornatylǵan bolatyn.

Pavlodar oblysynda avtomobıl joldarynyń 5 ýchaskesi jáne 5 qubyr baqylaýǵa alynyp, 462 sý ótkizý qubyry ashyldy. Sý tasqyny saldaryn joıý maqsatynda jolshylar «Qalqaman – Baıanaýyl» jolynyń 100-105 shaqyrymy aralyǵyndaǵy ýchaskesinde kópirdiń qurylysyna kirisip ketti.

Soltústik Qazaqstan oblysynda joldardyń 37 ýchaskesi, 38 qubyr men 2 kópir sý astynda qalýy múmkin. Búginge deıin 582 qubyr ashylǵan.

Tutastaı alǵanda, búgingi tańda respýblıkalyq mańyzy bar joldarda 8826 qubyr ashyldy. Sý basý qaýpi tónip turǵan ýchaskelerde 797 tehnıka jumys istemek. QR IIDM Avtomobıl joldary komıteti, «QazAvtoJol» UK» AQ jáne «Qazaqavtojol» JShS qyzmetkerleri arasynda táýlik boıǵy kezekshilik uıymdastyryldy. Búginge deıin sý arnalarynyń tasýy baıqalǵan joq.