Qazaqstanda aýyz sý men mıneraldy sý bir jylda 29 paıyzǵa qymbattaǵan

ASTANA. QazAqparat - Osy jyldyń sáýir aıyndaǵy kórsetkish boıynsha, alkogolsiz sýsyndar bir jylda 22,7 paıyzǵa qymbattaǵan. Bul kórsetkish bir jyl buryn 14 paıyz bolatyn, dep habarlaıdy QazAqparat Energyprom.kz resýrsyna silteme jasap.

Salqyndatqysh sýsyndardyń baǵasy 27 paıyzǵa qymbattady. Sý (mıneraldy jáne aýyz sý) baǵasy da aıtarlyqtaı óskeni baıqalyp otyr: 29,1 paıyzǵa (bir jyl buryn bul kórsetkish 18 paıyz edi).

Salqyndatqysh sýsyndar bir jylda 26,8 paıyzǵa qymbattady (bir jyl burynǵy kórsetkish – 16,2 paıyz).

2023 jyldyń sáýir aıyndaǵy esep boıynsha, mıneraldy sý 31, 4 paıyzǵa qymbattaǵan.

Qazaqstandaǵy óńirlerge kelsek, baǵa ósimi jóninen Jetisý oblysy aldyńǵy orynda: mıneraldy sý baǵasy bir jylda 66, 4 paıyzǵa ósken.

Odan keıingi orynda Qyzylorda (49, 5 paıyz) jáne Batys Qazaqstan oblysy (48,1 paıyz) tur.

Ulytaý oblysy (8,3 paıyz), Shymkent (11,4 paıyz) jáne Túrkistan oblysyndaǵy (18,5 paıyz) kórsetkish ózge aımaqtarmen salystyrǵanda tómen.

Aýyzsý baǵasy bir jyldyń ishinde 25,8 paıyzǵa ósti. Qymbatshylyq jóninen Aqmola jáne Abaı oblystary kósh basynda: 43 jáne 42,6 paıyz.

Aýyzsý baǵasy Qostanaı oblysynda da qymbattaǵan: 31, 5 paıyz. Odan keıingi orynda Túrkistan (10,9 paıyz), Batys Qazaqstan (15,9 paıyz) jáne Pavlodar (15,2 paıyz) oblysy tur.

Salqyndatqysh sýsyndardyń ishinde, ásirese gazdalmaǵan sýsyn baǵasy óskeni anyqtalyp otyr: bir jylda 34,7 paıyzǵa qymbattaǵan.

Óńirlerge kelsek, Batys Qazaqstan oblysynda gazdalmaǵan sýsyndardyń baǵasy birden 85, 3 paıyzǵa kóterilgen.

Odan keıingi orynda Atyraý, Shyǵys Qazaqstan oblysy (51, 9 paıyz jáne 47, 7 paıyz) tur.

Al Jambyl oblysy (14, 5 paıyz), Aqtóbe (23,6 paıyz), sondaı-aq Pavlodar jáne Mańǵystaý (ár óńirde 24,6 paıyz) oblystary sońǵy orynǵa jaıǵasty.

Gazdalǵan sýsyndar bir jylda 25,2 paıyzǵa qymbattaǵan. Óńirler boıynsha, Aqmola (46,9 paıyz), Jetisý (40,2 paıyz) jáne Abaı oblysy (36,8 paıyz) aldyńǵy orynda tur.

Al tómen kórsetkish Pavlodar (bir jylda 5,1 paıyz), Jambyl (13,5 paıyz) jáne Qaraǵandy oblysynda (15,2 paıyz) baıqalǵan.

Osy jyldyń qańtar-naýryz aıyndaǵy kórsetkish boıynsha, Qazaqstanda 142,8 mln lıtr hosh ıistendirilmegen jáne tátti qosylmaǵan sý óndiriske shyqty.

Bul 2022 jylmen salystyrǵanda 2,6 paıyzǵa artyq.

Basqa alkogolsiz sýsyndar 590 mln lıtr kólemde shyǵarylǵan. Ótken jyldyń qańtar-naýryz aılarymen salystyrǵanda bul 13,7 paıyzǵa tómen.