Qazaqstanda aýyldarǵa joǵary jyldamdyqty ınternetti tartýǵa shetel ınvestorlary qosylmaq

ASTANA. QazAqparat - «Qazaqtelekom» AQ elimizdiń aýyldyq jerlerin keń jolaqty ınternetpen qamtamasyz etý jobasyn iske asyrý boıynsha shetel ınvestorlaryn izdestirýde. Bul týraly QR Investıtsııalar jáne damý mınıstrligi Baılanys, aqparattandyrý jáne aqparat komıteti tóraǵasynyń orynbasary Dmıtrıı Golobýrda málim etti.

«Aýyldyq jerlerdi sapaly keń jolaqty ınternet qyzmetimen qamtamasyz etý úshin 2016 jyldan bastap eldi mekenderde baılanystyń talshyqty-optıkalyq jelileri qurylysyn júrgizý josparlanyp otyr. Bul jobany iske asyrý memlekettik-jeke seriktestik bazasynda júzege asyrylady, onyń ishinde syrtqy ınvestorlardy tartý eskerilgen. Qazirgi kezde «Qazaqtelekom» AQ áleýetti ınvestorlarmen kelissózder júrgizýde. Jobaǵa shamamen 66 mlrd. teńge ınvestıtsııa salý qajettilik etedi», - dedi ol. Osy oraıda tóraǵanyń orynbasary joba 2016 jyldan 2020 jyl aralyǵynda úsh kezeńde júzege asyrylatynyn atap ótti. Jyldamdyǵy joǵary ınternet 250 turǵyny bar aýyldarǵa jetedi. Onyń sózine qaraǵanda, Qazaqstanda 6,7 myńǵa jýyq eldi mekender bar. Bul aýyldarda 7,5 mln. adam ómir súrýde. Tek 1041 eldi meken keń jolaqty ınternettiń qyzmetterine qosylyp otyr. Al 5658 aýyldyq jerdegi 4 mıllıonǵa jýyq turǵyn joǵary jyldamdyqty ınternetke qosylmaǵan kórinedi.