Qazaqstanda aýyl sharýashylyǵy jerleri qashan tolyq tsıfrlandyrylady

NUR-SULTAN. QazAqparat - Aýyl sharýashylyǵy jerlerin tsıfrlandyrý jedeldetiledi. Bul týraly Senatta Aýyl sharýashylyǵy vıtse-mınıstri Baǵlan Bekbaýov málim etti, dep habarlaıdy QazAqparat tilshisi.

«Memleket basshysynyń jerdi aýyl sharýashylyǵyna tartý jónindegi tapsyrmasyna sáıkes, jerdi qashyqtan zondtaý arqyly aýyl sharýashylyǵy jerlerin paıdalaný boıynsha memlekettik baqylaýdy júzege asyrýǵa múmkindik beretin ǵarysh monıtorıngi júıesiniń qanatqaqty jobasy ótti. Osy jobanyń aıasynda qazir pılotty óńirlerdiń ǵarysh monıtorıngi qorytyndysy boıynsha 8,3 mln gektarǵa tarta paıdalanylmaıtyn jer anyqtalyp, onyń ishinde 2,6 mln gektar jaıylym jeri kelisken túrde memleket menshigine qaıtaryldy. Bul baǵyttaǵy jumystar ary qaraı jalǵastyrylyp jatyr»,- dedi B. Bekbaýov Senattaǵy tsıfrlandyrý tehnologııalaryn aýyl sharýashylyǵyna endirý taqyrybyndaǵy dóńgelek ústel otyrysynda.

Onyń aıtýynsha, qazirgi kezde tsıfrlandyrýǵa arnalǵan ári talap etiletin aýyl sharýashylyǵy jerleriniń 39 paıyzy tsıfrlandyrylǵan.

«Qazirgi tehnologııalardy qoldana otyryp, qalǵan 61 paıyz jer bóligin biz 5 jylda tsıfrlandyryp, meńgerimiz dep josparlaǵan edik. «Qazaqstan Ǵarysh sapary» ulttyq kompanııasymen birlesken jumystyń nátıjesinde, bul jumysty eki jylda aıaqtamaqpyz. ıAǵnı besten eki jylǵa qysqartamyz», - dedi vıtse-mınıstr.

Budan buryn habarlanǵandaı, Senattaǵy búgingi otyrysta jer berýdiń qazirgi tártibine biraz ózgerister engiziletini aıtyldy.