Qazaqstanda aýyl sharýashylyǵy tehnıkasynyń 76 paıyzy tozǵan

NUR-SULTAN. QazAqparat – Aýyl sharýashylyǵy tehnıkasy parkiniń ortasha tozý kórsetkishi 76 paıyzdy qurady. Bul týraly Aýyl sharýashylyǵy mınıstrligi baspasóz qyzmetinen málimdedi, dep habarlaıdy QazAqparat tilshisi.

«Respýblıkada 147 myń traktor, 38 myń kombaın, 4,7 myń egis kesheni, 77 myń dán sepkish, 13 myń destelegish, 73 myń traktor tirkemesi, 5,8 myń búrikkish, 221 myń topyraq óńdeý jabdyǵy bar. Ózdiginen júretin tehnıkanyń búkil parkiniń ortasha tozýy 76 paıyzdy qurady», - delingen mınıstrliktiń QazAqparat agenttigine bergen jaýabynda.

Agroónerkásiptik keshendi tehnıkalyq qaıta jaraqtandyrý máselesin sheshý jáne aýyl sharýashylyǵy tehnıkasyn satyp alýdy jeńildetý úshin tıisti memlekettik qoldaý baǵdarlamalary eskerilgen.

«Birinshiden, ınvestıtsııalyq shyǵyndardy sýbsıdııalaýǵa toqtalsaq, aýyl sharýashylyǵy tehnıkasyn satyp alǵan kezdegi qunynyń 25-30 paıyzy memleket bıýdjetinen óteledi. Budan basqa, oblystardyń aýmaqtaryn damytý baǵdarlamalarynda kózdelgen aýyl sharýashylyǵy tehnıkasynyń, mashınalar men jabdyqtardyń basym túrleri boıynsha óńir ákimdikteriniń jergilikti bıýdjet qarajaty esebinen sýbsıdııalaý normatıvterin 50% ulǵaıtýǵa quqyǵy bar», - dep atalyp ótken vedomstvo málimetinde.

Ekinshiden, aýyl sharýashylyǵy tehnıkasyn satyp alý úshin kredıt/lızıng boıynsha syıaqy stavkasyn sýbsıdııalaý (10%) qarastyrylǵan.

Satyp alynatyn aýyl sharýashylyǵy tehnıkasynyń negizgi kólemi lızıng arqyly keletinin eskere otyryp, kredıt/lızıng boıynsha syıaqy stavkasyn 10% mólsherinde sýbsıdııalaǵanda, AShTÓ úshin túpkilikti mólsherlemeni 7%-ǵa deıin tómendetýge múmkindik beredi («QazAgroQarjy» AQ qoldanystaǵy syıaqy stavkasy 17% bolǵan kezde).

Bul óz kezeginde AShTÓ úshin qarjylyq júktemeni tómendetedi.

«Úshinshiden, «Báıterek» holdınginiń qarjy ınstıtýttary (QazAgroQarjy, Ónerkásipti damytý qory) arqyly elimizde óndirilgen aýyl sharýashylyǵy tehnıkasyna jeńildetilgen kredıt berý (jylyna 6-7%) baǵdarlamasy qamtylyp otyr.

«Atalǵan memlekettik qoldaý baǵdarlamalaryn júzege asyrý óz nátıjesin berip keledi. Sońǵy 5 jylda aýyl sharýashylyǵy tehnıkasy parkiniń jańarý deńgeıi oń dınamıkany kórsetip otyr. Eger 2017 jyly jańartý kórsetkishi 1,9% bolsa, 2021 jylǵa qaraı ol 4,3% boldy (2 ese ósti). «QazAgroQarjy» AQ bas lızıngtik kompanııasynyń málimetine qaraǵanda, 2017 jyly 2376 aýyl sharýashylyǵy tehnıkasy satyp alynsa, 2021 jyly 7248 (3 ese ósti) tehnıka qamtyldy», - delingen mınıstrlik aqparatynda.

Budan buryn habarlanǵandaı, qazirgi jaǵdaıdy eskere otyryp, orta eseppen alǵanda tehnıkanyń jańarý deńgeıi 8-10 paıyzdan kem bolmaýy kerek.