Qazaqstanda aýyz sý tapshylyǵy bolmaıdy — mınıstrlik

<p>Jyl saıyn Qazaqstan aýmaǵynda 102,3 tekshe shaqyrym sý qory jınalady. Onyń ishinde 1,2 tekshe shaqyrymy, ıaǵnı, jalpy sý kóleminiń 1%-dan astamy turǵyndardy aýyz sýmen qamtýǵa jumsalady, dep habarlaıdy <a href="https://kaz.inform.kz/" target="_blank" rel="noopener">Kazinform</a>. </p>

Parlament Májilisiniń depýtaty Sergeı Ponomarevpen dıalog barysynda Sý resýrstary jáne ırrıgatsııa birinshi vıtse-mınıstri Bolat Beknııaz turǵyndardy sapaly aýyz sýmen qamtamasyz etý jumysy týraly aıtty.

Ekonomıkanyń qajettiligi úshin jyldyq sý tutyný shamamen 25 tekshe shaqyrymdy quraıdy.

Onyń 65 paıyzy — aýyl sharýashylyqtyń, 25 paıyzy — ónerkásip qajettilikterine baǵyttalady.

«Sol sebepti qazaqstandyqtar aýyz sýdan taryǵady dep aıtýǵa bolmaıdy. Barlyq normatıvtik qujattarda, Sý kodeksinde eń birinshi orynda azamattarymyzdy aýyz sýmen qamtamasyz etý máselesi tur. Biz aldaǵy 2 jylda elimizdiń barlyq óńirin ortalyqtandyrylǵan sý júıesimen qamtamasyz etýdi josparlap otyrmyz. Qandaı tabıǵı jaǵdaı bolmasyn, klımat ózgerisi nemese transshekaralyq sý resýrstarynyń azaıýy aýyz sý tapshylyǵyna ákelmeıdi. Sebebi turǵyndarǵa qajetti aýyz sý kólemi jalpy sý qorynyń 1%-yn ǵana quraıdy», — dedi sý resýrstary jáne ırrıgatsııa birinshi vıtse-mınıstri Bolat Beknııaz.