Qazaqstanda aýyr kólikterge avtojolda júk tasymaldaýǵa tyıym salynbaq

<p>ASTANA. KAZINFORM &ndash; Karerde júrýge arnalǵan HOWO jáne SHACMAN kólikterine elimizdiń joldarynda júk tasymaldaýǵa tyıym salynady. Bul týraly QR Kólik mınıstri Marat Qarabaev málim etti.</p>

Búgin Májilistiń jalpy otyrysynda depýtattar avtojoldardy kútip ustaý máselesine qatysty suraq qoıdy.

Óz kezeginde M. Qarabaev joldardy kútip ustaýda úsh basym baǵytqa ekpin qoıylǵanyn aıtty.

«Birinshiden, 25 myń shaqyrym respýblıkalyq joldy kútip ustaý úshin jylyna 80 mlrd teńge qarajat qajet. Ókinishke qaraı, bul somany tolyq bóle almaımyz, 35 mlrd teńgesi ǵana baǵyttalady. Qalǵan aqshany qazir aqyly joldan túsetin qarajat esebinen baǵyttap jatyrmyz. Ekinshiden, joldar jaqsy jaǵdaıda bolýy úshin tıisti jabdyqtar men tehnıka kerek. Normatıv boıynsha 3 600 tehnıka qajet bolsa, sonyń 2,5 myńy bar, ıaǵnı 1 100 tehnıka jetpeıdi. Sondyqtan byltyr 350 tehnıka jáne bıyl taǵy 350 tehnıkany satyp aldyq. Bul óz kezeginde joldy kútip ustaýǵa eleýli yqpal etedi», - dedi mınıstr.

Sonymen qatar ol joldy kóbine aýyr júk kólikteri buzyp jatqanyn aıtty.

«Úshinshiden, júkti shamadan tys artyq júk tıegen aýyr kólikter jolǵa zalal keltirip otyr. 25 myń shaqyrym jolda nebári 18 ǵana ólsheý quraly ornatylǵan. Bizdiń maqsatymyz – qosymsha 220 ólsheý stantsııasyn el aýmaǵynda ornatý. Bıyl 20 qurylǵy qoıylady. Osy úsh basym baǵyt joldy kútip ustaýǵa múmkindik beredi», - dedi M. Qarabaev.

Vedomstvo basshysy júk kólikterin baqylaıtyn jańa júıe tamyz aıynda iske qosylatynyn aıtty.

«Atalǵan 18 ólsheý kamerasyna toqtalsaq, bul júıe avtomattandyrylǵan. «Sergek» sııaqty bizdiń ólsheý júıemiz sýretke túsirip, aıyppuldy tasymaldaýshyǵa joldap otyrady. Tıisti zań Senatta maquldanǵannan keıin, júıeni bıyl tamyz aıynda iske qosý josparlanǵan. Astananyń mańynda 29 karer bar. Elordaǵa kiretin 6 jolda osyndaı kamera qoıdyq. HOWO jáne SHACMAN (Qytaıda óndiriletin kólikter) kólikteri aýyr júk tasymaldaýǵa arnalǵan. Shetelde mundaı kólikter tek karerde júredi. Bul taqyryp boıynsha Parlamentke zańnamalyq usynyspen kelmekpiz. Elimizde 60 myńǵa jýyq osyndaı júk kóligi bar. Olarǵa avtojolda júrýge múldem tyıym salý usynylyp otyr. ıAǵnı, olarǵa júkpen jolda júrýge tyıym salynbaq. Eger krerge barý kerek bolsa, onda osy aýyr kólikter jolda tek júksiz júrýi tıis. Bul zańnamalyq usynystardy engizbekpiz. Osy arqyly joldaǵy aýyr júkti múldem toqtatpaqpyz», - dedi Marat Qarabaev.

Bul turǵyda Májilis tóraǵasy Erlan Qoshanov aýyr júk kólikterine qatysty pikir bildirdi.

«Joldyń sapasyna osy júk kólikteri áser etip otyrǵanyn bárimiz bilemiz. Olardyń bári joldarda baqylaýsyz júrip jatyr. Sebebi ólsheıtin quraldar tıisti deńgeıde qamtymaı otyr. Sonymen qatar, mobıldi beketter de joq», - dedi E. Qoshanov.