Qazaqstanda áýe reısteriniń keshigý máselesi qashan sheshiledi

<p>ASTANA. KAZINFORM &ndash; QR Kólik vıtse-mınıstri Talǵat Lastaev jaz aılarynda reısterdiń keshigýi derekterine qatysty túsinik berdi.</p>

«Reısterdiń keshýi ár memlekettegi ár kompanııada bolyp jatady. Bıyl bizdegi kórsetkish 77 paıyz shamasynda. Basqa memlekettermen salystyrsaq, AQSh-ta - 77 paıyz, Eýropada 76 paıyzdy qurady. Jalpy, bıyl osy kóretkish tómendep jatyr. Boeing óndirisinde, jańa ushaqtardy ákelýde problemalar baıqaldy. Máselen, bıyl biz 12 jańa bortty áýe kompanııalaryna jetkizemiz dep josparlaǵan edik. Qazir onyń tek 8-i keldi, al jyl sońyna deıin tórt ushaq jetkiziledi», - dedi T. Lastaev elordada áýe kóligi taqyrybynda ótken baspasóz máslıhatynda.

Onyń aıtýynsha, tamyz aıynda elimizde birneshe áýejaı jóndeýge jabylǵan. Bul turǵyda Astana áýejaıy túnde jumys istemeıdi.

«Sondyqtan kúndizgi reıs sany kóbeıdi. Áýejaı 24 saǵat boıy úzilissiz jumys istese, saǵatyna 10-12 reıs keletin. Qazir kúndiz bul kórsetkish 20-25-ke kóbeıgen», - dep túsindirdi vıtse-mınıstr.

Munymen qosa ol jaqynda jaýǵan burshaq biraz ushaqty zaqymdaǵanyn aıtty.

«Qazaqstandaǵy áýe kompanııalarynda 101 ushaq bar, onyń ishinde 10-y túrli sebeppen turyp qaldy. Beseýi burshaq jaýǵanda zaqymdaldy. Qazir sonyń bári jóndeldi. Sol kezde reısterdiń keshigýi kóbeıgen edi. Jalpy, atalǵan 10 ushaq reısterge kiristi. Budan bólek, Aqtóbe áýejaıynda ushý-qoný jolaǵy jóndelip jatyr, sondaı-aq Aqtaý áýejaıynda da osy jumystar bastaldy. Elimizdegi áýejaılarda jóndeý jumystary aıaqtalǵanan keıin, reısterdiń keshigýi máselesi sheshiledi», - dedi Talǵat Lastaev. 

Budan buryn habarlanǵandaı Kólik vıtse-mınıstri vetnamdyq kompanııanyń Qazaq Air-di satyp alýy rásimi kúzde aıaqtalatynyn rastady.