Qazaqstanda «Ata-analar akademııasy» jobasy iske qosylady
Bul týraly elordada bala tárbıesi jónindegi halyqaralyq konferentsııa qatysýshylaryna arnalǵan quttyqtaý hatynda QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy, Mádenıet jáne aqparat mınıstri Aıda Balaeva málim etti.
Atap aıtqanda, mınıstrdiń sózin forýmda QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen oqyp berdi.
— Tárbıe máseleleriniń ózektiligin eskere otyryp, ata-analardyń bala tárbıeleýdegi jaýapkershiligin arttyrýdyń mańyzy joǵary. Mádenıet jáne aqparat mınıstrligi Birikken Ulttar Uıymynyń Balalar qorymen (ıÝNISEF), Oqý-aǵartý mınıstrligimen jáne Qazaqstandaǵy balalardyń ál-aýqatyn arttyrý ınstıtýtymen birlesip, 2025 jyly «Ata-analar akademııasy» jobasyn júzege asyrýdy bastaıdy, — dedi A. Balaeva.
Osy joba aıasynda bala tárbıesindegi ozyq halyqaralyq jáne ulttyq tájirıbe jınaqtalyp, ata-analardy úzdiksiz aqparattandyrý jáne oqytý úshin alań qurylady.
Budan buryn habarlanǵandaı, elordada balalar men jastar tárbıesine arnalǵan halyqaralyq konferentsııa ótti.
Sonymen qatar, konferentsııa barysynda elimizde budan bylaı qamqorshylyq organdaryndaǵy qyzmetkerlerdiń sany eselep artatyny málim boldy.
Sharada «Kazakhstan Kids online» zertteý nátıjeleri de jarııalandy. Soǵan sáıkes 5-8 jas aralyǵyndaǵy qazaqstandyq balalardyń 40 paıyzy kún saıyn bos ýaqytyn ınternette ótkizetini belgili boldy.