Qazaqstanda áskerı polıtsııanyń ókilettigi keńeıtilmek

NUR-SULTAN. QazAqparat – Parlament Májilisinde «Áskerı polıtsııa organdary týraly» jáne «Qazaqstan Respýblıkasynyń keıbir zańnamalyq aktilerine áskerı polıtsııa organdary máseleleri boıynsha ózgerister men tolyqtyrýlar engizý týraly» zań jobalary tanystyryldy, dep habarlaıdy QazAqparat tilshisi.

Qorǵanys mınıstriniń orynbasary Sultan Qamaletdınovtyń aıtýynsha, «Áskerı polıtsııa organdary týraly» zań jobasy Qarýly Kúshterdegi quqyq tártibin nyǵaıtýǵa baǵyttalǵan fýntsııalardy bekitý, áskerı polıtsııa organdary qyzmetiniń mindetteri men ókilettikterin keńeıtýge negizdelgen.

«Áskerılerdiń jaraqat alýy men ólimi jaǵdaılaryna jol bermeý jáne aldyn alý maqsatynda áskerı qyzmet pen eńbek qaýipsizdigin qamtamasyz etý boıynsha júıeli jumysty uıymdastyrý qajettigi týyndady. Osyǵan baılanysty zań jobasynda áskerı qyzmettiń qaýipsizdigin qamtamasyz etýdi uıymdastyrý úshin vedomstvolyq qadaǵalaý fýnktsııasyn bekitý qarastyrylyp otyr», - dedi Qorǵanys mınıstriniń orynbasary.

Onyń sózine qaraǵanda, qazirgi kezde Qarýly Kúshterdiń áskerı polıtsııasy oryndaıtyn birqatar fýnktsııalar men mindetter zańnamalyq deńgeıde reglamenttelmegen.

Sonymen qatar, qoǵamdyq qaýipsizdik salasynda mindetterdi tıimdi oryndaý maqsatynda áskerı polıtsııa organdary áskerıleriniń quqyqtaryn keńeıtý usynylyp otyr. Osy oraıda olarǵa áskerı bólimsheler men mekemelerde áskerıler men azamattyq personal tulǵalarynyń jeke basyn kýálandyratyn qujattarǵa tekserý júrgizý, áskerdiń qatysýymen ótetin buqaralyq is-sharalar ornyna kireberiste adamdardyń zattaryn, kólikterin jáne ótkizetin júkterin tekserý, qyzmettik mindetin oryndaý kezinde beınejazba tehnıkalyq quraldaryn (vıdeotirkegish penvıdeojeton) paıdalaný quqy berilmek.

Munymen qosa, beıbitshilikti qoldaý boıynsha halyqaralyq mıssııalarda, onyń ishinde BUU mıssııalaryna áskerı polıtsııa ókilderiniń qatysýyn retteý maqsatynda zań jobasynda tıisti túzetý eskerilgen.