Qazaqstanda áskerı patrıottyq tárbıe berýdiń jańa aktisi qabyldanady

NUR-SULTAN. QazAqparat – Qazaqstandyqtardyń áskerı patrıottyq tárbıesin odan ári jetildire túsý maqsatynda jańa normatıvtik-quqyqtyq akt qabyldanady. Bul týraly Qorǵanys mınıstriniń orynbasary, general-leıtenant Sultan Kamaletdınov málim etti, dep habarlaıdy QazAqparat tilshisi.

«Áskerı patrıottyq jáne ıdeologııalyq jumys - bizdiń salanyń basty mindetteriniń biri. Bul baǵyttaǵy sharalar turaqty túrde uıymdastyrylyp keledi. Búginde azamattarǵa áskerı patrıottyq tárbıe berý erejesi týraly Úkimet qaýlysy qaralyp jatyr. Atalǵan normatıvtik-quqyqtyq aktini qabyldaý otandastarymyzdyń áskerı patrıottyq tárbıesin arttyra otyryp, qorǵanys salasynyń bekı túsýine sebep bolmaq. Jeke quramnyń moraldyq rýhyn nyǵaıtýda batyldyq, tabandylyq, namysshyl áskerı qyzmetshilerdiń jańa býynyn tárbıeleý mańyzdy», - dedi Sultan Kamaletdınov Ortalyq kommýnıkatsııalar qyzmeti alańynda ótken baspasóz máslıhatynda.

Mınıstr orynbasarynyń málimdeýinshe, armııaǵa degen senim salada atqarylyp jatqan jumystardyń nátıjesimen ólshenedi.

«Adamgershilik qasıet - áskerı uıymdardyń damýyndaǵy mańyzdy kórsetkish. Armııada qatal tártip birinshi orynda bolýy kerek. Qarýly kúshterdi reformalaý áskerdiń jaýyngerlik ázirlik deńgeıin sapaly arttyrýdy qamtamasyz etetini sózsiz», - deıdi ol.

Sondaı-aq, spıker áskerı qyzmetkerlerdi baspanamen qamtý máselesin kóterdi.

«Taıaýda Memleket basshysy áskerı sala qyzmetkerlerdiń turǵyn úı máselesin sheshýge qatysty zańǵa qol qoıdy. Atalǵan shara áskerılerdiń áleýmettik jaǵdaıyn jaqsartýǵa baǵyttalǵan», - dedi S. Kamaletdınov brıfıngte.

Buǵan deıin habarlaǵanymyzdaı, áskerı mindetin ótegender memlekettik organdarǵa jumysqa ornalasady.