Qazaqstanda áskerı qyzmetshilerdi turǵyn úımen qamtamasyz etý tetigi jetildirilmek

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.

Zań jobasynda áskerı qyzmet ótkerýdi jáne arnaýly memlekettik organdar qyzmetkerlerin, áskerı qyzmetshilerdi, sondaı-aq olardyń otbasy múshelerin turǵyn úımen qamtamasyz etý tetigin jetildirýmen baılanysty normalar kózdelip otyr.

QR Qorǵanys mınıstriniń orynbasary Daryn Tuıaqovtyń aıtýynsha, osy baǵytta úsh zańǵa túzetý engiziledi. «Turǵyn úı qatynasy týraly» zańda mynalar qarastyrylǵan:

- birinshi - qaıtys bolǵan áskerı qyzmetshiniń, arnaýly organ qyzmetkeriniń otbasy múshesine qyzmettik baspanany jekeshelendirý, aqshalaı ótemaqy alý, aıyrbastaý quqyǵyn berý;

- ekinshi - qyzmettik turǵyn úıdi qaldyq quny boıynsha nemese óteýsiz jekeshelendirý;

- úshinshi – qyzmettik úımen eki ret qamtamasyz etýdi shekteý;

- tórtinshi – «modýldi turǵyn úı» uǵymyn engizý.

«Qarýly kúshter, basqa da ásker men áskerı qurylym úshin «modýldi turǵyn úı» uǵymy alǵash ret engiziledi. Bul - jyldam qajet bolǵan kezde turǵan jerin aýystyrýǵa bolatyn turǵyn úı. Olardy satyp alý qysqa ýaqytta áskerdi turatyn orynmen qamtamasyz etýge, al geosaıası jaǵdaı ózgergende olardy osy úımen birge basqa jerge shyǵynsyz kóshirýge múmkindik beredi», - dedi D. Tuıaqov.

«Áskerı qyzmet jáne áskerı qyzmetshiniń mártebesi týraly» zańda:

- áskerı qyzmetshiniń quqyqtary men mindetterin keńeıtý – zań jobasynda áskerı qyzmetshige arnaýly organ qyzmetkerine uqsas quqyq berý, mindetter júkteý usynylady;

- attestattaý kezinde polıgrafologııany júrgizý;

- áskerı qyzmettiń úzdiksiz bolýyn belgileý eskerilgen.

«Zań jobasynda áskerı qyzmetshi qyzmetten shyǵarylǵan kúnnen bastap ony qaıtadan qyzmetke alǵanǵa deıin úsh aıdan aspasa, osy ýaqytta eńbek qatynasy bolmasa, onyń áskerı qyzmeti úzdiksiz dep tanylady», - dep túsindirdi ol.