Qazaqstanda áskerı bılet qashan tsıfrlandyrylady

ASTANA. QazAqparat – «Ulttyq aqparattyq tehnologııalar» AQ Basqarma tóraǵasy Rostıslav Konıashkın áskerı bıletter EGOV mobile platformasyna qashan shyǵarylatynyn aıtty, dep habarlaıdy QazAqparat tilshisi.

«Áleýmettik jelilerde jáne BAQ-ta áskerı bıletti tsıfrlandyrý týraly habar jarııalandy. Qorǵanys mınıstrliginen osyndaı usynys boldy ma? Bul jumystar bastaldy ma?», - dep surady tilshiler Ortalyq kommýnıkatsııalar qyzmetinde ótken baspasóz máslıhatynda.

Rostıslav Konıashkın Qorǵanys mınıstrligimen, onyń ishinde áskerı bılet, tirkeý kýáligi boıynsha, osy qujattardy tsıfrlyq formatqa shyǵarý jumystary júrip jatqanyn aıtty.

«Bul qujattardy tsıfrlandyrý jumystaryn josparlap otyrmyz, tipti bastap kettik deýge bolady. Meniń oıymsha, bul jumys kelesi jyldyń birinshi jartyjyldyǵynda aıaqtalady. Bıyl basymdyqtar boıynsha el basshylyǵy qoıǵan basqa da mindetterdi iske asyramyz», - dedi Rostıslav Konıashkın.