Qazaqstanda áskerge shaqyrylýshy sanatyna jatatyn qansha azamat bar – mınıstrlik jaýaby

ASTANA. QazAqparat – Búginde elimiz boıynsha jalpy sany 800 myńnan asatyn áskerge shaqyrylýshy bar. Bul týraly QazAqparat tilshisiniń saýalyna jaýap bergen Qorǵanys mınıstrliginiń resmı ókili Ǵanı Artyqov aıtty.

«Qazirgi tańda Qazaqstan boıynsha 800 myńnan astam áskerge shaqyrylýshy bar. Biz solardyń jyl saıyn 34-36 myńyn ásker qataryna shaqyramyz. Bıylǵy kúzde 18 myń azamat shaqyrylady. Al, jalpy kóktem jáne kúzgi shaqyrý merzimderin qosa eseptegende olardyń sany 36 myń bolady. Jastardyń ishinen densaýlyǵy jaqsy, áskerge daıyndalǵan, moraldyq-psıhologııalyq turǵydan shyńdalǵan azamattarymyzdy áskerge jiberip jatyrmyz», - dep jaýap berdi Qorǵanys mınıstrliginiń resmı ókili tilshi saýalyna oraı.

Ǵanı Artyqovtyń aıtýynsha, búginge deıin áskerden jaltarǵan jastardyń birde-birine iri kólemde aıyppul salynbaǵan. Tek áskerge shaqyrý kezinde pýnktige ýaqtyly barmaǵandar nemese áskerı tirkeý erejesin buzǵandar ǵana az kólemde aıyppul arqalapty.

Sonymen qatar, ol aıyppul salynǵan azamattar áskerı mindetin óteýden bosatylmaıtynyn málimdedi.