Qazaqstanda «Ashyq aspan-2016» oqý- jattyǵýy ótti

ASTANA. QazAqparat - TMD-ǵa qatysýshy memleketterdiń áýe shabýylyna qarsy qorǵanysy birikken júıesiniń birlesken is-sharalaryn ótkizý josparyna sáıkes Qazaqstan Respýblıkasynyń aýmaǵynda Reseı jáne Qyrǵyzstan Qarýly Kúshterimen ózara is-qımyl jasaýda «Ashyq aspan-2016» jedel-taktıkalyq komandalyq-shtabtyq oqý-jattyǵýy ótkizildi.

Bul týraly QR Qorǵanys mınıstrliginiń baspasóz qyzmeti habarlady.  



Oqý-jattyǵýdyń maqsaty áskerı basqarý organdarynyń jaýyngerlik daǵdy deńgeıin jetildirý, TMD-ǵa múshe qatysýshy memleketterdiń áýe shabýylyna qarsy birikken júıesi sheńberinde Áskerı-áýe kúshteri men Áýe shabýylyna qarsy qorǵanys quramalary men bólimderindegi jaýyngerlik eseptoptardyń úılesimdiligin jetildirý bolyp tabylady. Oqý-jattyǵý QR QK Áýe qorǵanysy kúshteriniń bas qolbasshysy avıatsııa general-leıtenanty Nurlan Ormanbetovtiń basshylyǵymen júrgizildi. Onyń barysynda áýe nysanalaryn shartty túrde joıý, qaǵyp túsirý, ilesip júrý jáne anyqtaý máseleleri pysyqtaldy. Bul birlesken oqý-jattyǵýǵa Qazaqstan Respýblıkasy Qarýly Kúshteri Áýe qorǵanysy kúshteriniń atynan «Saryarqa» (Qaraǵandy qalasy), Balqash, Shymkent, Aqtaý jáne Taldyqorǵan áýeaılaqtarynan ushyp shyqqan Sý-27, Mıg-27, MıG-29, MıG-31, Sý-25 jáne L-39 avıatsııalary, sondaı-aq tolyq quramda Áýe shabýylyna qarsy qorǵanys áskerleriniń kúshteri men quraldary tartyldy. Quramalar men bólimderdiń basqarý organdary, jaýyngerlik eseptoptary oqý-jattyǵýǵa qoıylǵan tapsyrmalardy sátti oryndady jáne barlyq mejeler aıqyndalyp,  shartty túrde joıyldy.