Qazaqstanda arnaıy bilim berý mekemelerinde 200-ge tarta bala tárbıelenýde

NUR-SULTAN. QazAqparat - Elordadaǵy QR BǴM jáne Qazaqstandaǵy BUU Balalar qory (ıÝNISEF) birlesip uıymdastyrǵan respýblıkalyq jıynda jaýapkershilikke tartylǵan balalardyń quqyǵyn qorǵaý máselesi talqylandy, dep habarlaıdy QazAqparat tilshisi.

«Búgingi tańda elimizde balalarǵa arnalǵan 8 arnaıy bilim berý mekemeleri bar. Olardyń 7-i arnaıy bilim berý uıymy bolsa, 8-shisi Shyǵys Qazaqstandaǵy erekshe rejimdegi uıym. Jalpy, elimizde búgingi tańda 200-ge jýyq bala osy uıymdarda oqyp, tárbıelenip jatyr. ıAǵnı, bul quqyqbuzýshylyqqa beıim balalar», - deıdi Bilim jáne ǵylym mınıstrligi Balalardyń quqyqtaryn qorǵaý komıteti bala quqyqtary jáne halyqaralyq yntymaqtastyq basqarmasynyń basshysy Erjan Jırenbaı.

Erjan Jırenbaıdyń aıtýynsha, Shyǵys Qazaqstandaǵy erekshe rejimdegi arnaıy ortalyqta orta jáne aýyr qylmys jasaǵan, 14 jasqa deıingi balalar tárbıelenedi.

«Al qalǵan jeti bilim berý mekemesinde júıeli túrde sabaqqa barmaı júrgen, ákimshilik quqyqbuzýshylyq jasaǵan balalar oqytylady. Jalpy, 2017 jyl men 2018 jyldyń kórsetkishterin salystyrǵanda balalar arasyndaǵy quqyqbuzýshylyq 5 paıyzǵa tómendedi. Bul - jaqsy kórsetkish. Al sońǵy 10 jylda balalardy tárbıeleıtin arnaıy uıymdardyń sany shamamen 15-ten 8-ge azaıdy», - deıdi Erjan Jırenbaı.

Basqarma basshysy óz sózinde jaýapkershilikke tartylǵan balalardyń quqyqtaryn qorǵaý jumystaryn kúsheıtý baǵytynda qandaı jumystar júrgizilip jatqanyn da sóz etti.

«Osy jyldyń 1 sáýirinde «QR balalardyń quqyqtaryn qorǵaý jónindegi qyzmetterdi júzege asyratyn uıymdardyń qyzmetimen baılanysty máseleler boıynsha keıbir zańnamalyq aktilerine ózgerister men tolyqtyrýlar engizý týraly» zańǵa Prezıdent qol qoıǵan bolatyn. Sol zańda balalardyń quqyqtaryn qorǵaý salasynda standart ázirleý qarastyrylǵan. ıAǵnı, qazirgi ýaqytta devıantty minez-qulyqqa ıe balalarǵa arnalǵan uıymdar bar. Sol uıymdarda balalarǵa kórsetiletin qyzmetti sapaly ári tıimdi ete otyryp, halyqaralyq standarttarǵa sáıkestendirý maqsatynda búgin biz is-sharany uıymdastyryp otyrmyz. Munda halyqaralyq tájirıbeler men tıimdi tetikter talqylanyp, jańa ádister usynylatyn bolady», - deıdi Erjan Jırenbaı.

Basqarma basshysynyń aıtýyna qaraǵanda, Qazaqstanda balalardyń quqyqtaryn qorǵaý baǵytynda arnaıy áleýmettik qyzmet kórsetý standarttary ázirlenýde. Búgingi jıynda keltirilgen qorytyndylar jańa standarttarǵa engiziletin bolady.