Qazaqstanda arnaýly áleýmettik qyzmetterdi lıtsenzııalaý bastaldy
Eńbek jáne halyqty áleýmettik qorǵaý mınıstrliginiń málimetinshe, bul olardyń qyzmet kórsetý sapasyn jaqsartýǵa jaǵdaı jasaıdy jáne osy saladaǵy buzýshylyqtar sanyn azaıtýǵa oń yqpal etedi.
Lıtsenzııalaýdy engizý — arnaýly áleýmettik qyzmetter kórsetý júıesin jańǵyrtý kezeńderiniń biri. Ol kórsetiletin qyzmetterdiń sapasyn arttyrýǵa; kórsetiletin qyzmetti alýshylardyń qaýipsizdigi men quqyqtaryn qorǵaýǵa kepildik berýge; AÁQ usynatyn uıymdar úshin biryńǵaı standarttardy belgileýge baǵyttalǵan.
Arnaýly áleýmettik qyzmetter kórsetetin barlyq menshik nysanyndaǵy uıymdar lıtsenzııalanady.
Lıtsenzııa alýdyń negizgi sharttary: sanıtarlyq normalar men Órt qaýipsizdigi erejelerine sáıkes keletin arnaýly áleýmettik qyzmet kórsetýge jaramdy ǵımarattyń bolýy; qajetti materıaldyq-tehnıkalyq bazanyń jáne qyzmetkerler quramynyń bolýy; halyqtyń júrip týrýy shekteýli toptary úshin ǵımarattyń qoljetimdiligin qamtamasyz etý jáne basqalar.
2024 jyldyń qazan aıynan bastap QR EHÁQM Áleýmettik qorǵaý salasyndaǵy retteý jáne baqylaý komıtetiniń aýmaqtyq departamentteri lıtsenzııa aldy taldaý júrgizdi. Jergilikti atqarýshy organdarmen jáne ÚEU-men birlesip, AÁQ kórsetetin barlyq uıymdardy lıtsenzııalaýǵa daıyndaý máseleleri pysyqtaldy.
Lıtsenzııa alýǵa ótinim Áleýmettik qyzmetter portaly (aleumet.egov.kz) arqyly beriledi.
— Lıtsenzııalaý kórsetiletin arnaýly áleýmettik qyzmetterdiń sapasyn arttyrý, múgedektigi bar adamdardy jáne kórsetiletin qyzmetti alýshylardyń ózge de sanattaryn áleýmettik ońaltýdyń tıimdiligin kóterý úshin jaǵdaılar jasaıdy, sondaı-aq osy saladaǵy buzýshylyqtar sanyn azaıtýǵa oń yqpal etedi, — dep túsindirdi mınıstrlik.
Aıta keteıik, buǵan deıin Eńbekmıni aılyǵy 20%-ǵa ósetin mamandardy atady.