Qazaqstanda «ArMI-2019» oıyndary bastaldy
Saıysqa álemniń 13 memleketinen kelgen áskerıler baq synap jatyr.
Ashyq áskerı oıyndardyń ashylý saltanatynda QR Qorǵanys mınıstri Nurlan Ermekbaev, RF Qorǵanys mınıstriniń orynbasary Aleksandr Fomın qatysyp jatyr.
«RF Qarýly kúshteriniń bastamasymen bastalǵan halyqaralyq armııa oıyndary bıyl 5 jyl qatarynan ótkizilip jatyr. 5 jylda saıystardyń mazmuny keńeıip, mańyzy arta bastady. 39 eldiń áskerıleri qatysyp jatyr. 10 memleket terrıtorııasynda jarys ótip jatyr. Baıqaýlar sany 14-ten 32-ge artty. Bul oıyndardyń dárejesi burynǵydan da artyp, halyqaralyq jarystardyń deńgeıine jetedi degen oıdamyz. Kóshpendi halyqtarda ulttyq oıyndardyń kóbi er azamattardyń áskerı qabiletin arttyrýǵa baǵyttalǵan.
QR Tuńǵysh Prezıdenti Nursultan Nazarbaev «Uly dalanyń 7 qyry» maqalasynda tarıhymyzdyń birinshi qyryn áskerı istegi úlken tóńkeristi atady. Bul oıyndar Qazaqstanda tórtinshi ret ótip jatyr. Bul biz úshin maqtanysh. Sebebi Qazaqstan túrli elderdiń áskerı tehnıkalyq baılanysynyń artýyna úles qosyp jatyrmyz», - dedi QR Qorǵanys mınıstri Nurlan Ermekbaev.
«Otar» áskerı bazasynyń terrıtorııasynda 7-15 tamyz aralyǵynda Ázerbaıjan, Armenııa, Belarýs, Venesýela, Zımbabve, Mysyr, Iran, Qyrǵyzstan, Reseı, Sırııa, Tájikstan, Ózbekstan, Qytaı elderinen áskerıler drondy ushyrý, artıllerııalyq qarýdan oq atýdan baq synaıdy.
Artıllerııalyq qarýdan oq atýǵa 12 eldiń áskerıleri qatyssa, pılotsyz ushaq ushyrýdan 4 el baq synaıdy.
Baılanysshylar saıysynda baılanysshy áskerıler basqarý dabyldaryn qabyldaý, qabyldaý stansasyn ashý, baılanys torabyn aýystyrý mashyǵyn kórsetedi.
Qazaqstan Qarýly kúshteriniń ókilderi 3 baıqaýǵa da qatysyp qana qoımaı, shetelderde ótip jatqan 13 baıqaýǵa da qatysyp jatyr.
Barlyǵy 32 sport túri bolsa, qazaqstandyqtar 16 sport boıynsha qatysady.
Aıta keterligi, ArMI-2019 halyqaralyq áskerı oıyndary 3 tamyzda RF terrıtorııasynda «Patrıot» kórme kesheninde bastaldy.