Qazaqstanda ardagerlerge jasalyp jatqan qamqorlyqqa rızamyn - Eskendir Kárimuly

ASTANA. QazAqparat - Qazaqstanda ardagerlerge jasalyp jatqan qamqorlyqqa rızamyn, dedi búgin Astanadaǵy «Qazaq Eli» alańynda ótken Otan qorǵaýshy kúni men Uly Otan soǵysyndaǵy Jeńistiń 70 jyldyǵyna arnalǵan áskerı paradtan keıin UOS ardageri Eskendir Kárimuly.

Kópti kórgen qarııa qıyn-qystaý zamandaǵy bastan ótken oqıǵalardy aıtyp, ómirden túıgenderimen bólisti. Sonymen qatar, qaharman qart jas urpaqty eliniń patrıoty bolýǵa shaqyrdy.

«Ardagerler nazardan tys qalyp jatqan joq. Kórsetilip otyrǵan qoldaýy úshin Elbasymyzǵa alǵysymdy aıtamyn. Uly Jeńistiń 70 jyldyǵy barshamyzǵa qutty bolsyn! Eń bastysy, elimiz aman bolsyn! Soǵystyń náýbetin keleshek urpaq kórmesin!»,-dep tilegin bildirdi Eskendir Kárimuly.

Búginde 89 jasqa jetken qart maıdanger Úshinshi Belarýs maıdanynda joryqqa shyqqan, sodan keıin Berlınge deıin jetip, soǵystyń aıaǵyna deıin qatysqan. Maıdanǵa 1943 jyly Kókshetaýdan attanǵan ardager soǵys aıaqtalǵannan keıin de 1953 jylǵa deıin ásker qatarynda qyzmet etken.