Qazaqstanda árbir ekinshi oqýshy zorlyq-zombylyqqa dýshar bolady

ASTANA. QazAqparat - Qazaqstanda mektep jasyndaǵy árbir ekinshi bala kúshteýge nemese ozbyrlyqqa dýshar bolady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda Adam quqyǵy boıynsha ulttyq ortalyqtyń jetekshisi Vıacheslav Kalıýjnyı málim etti.

«Ókinishke oraı, balalarǵa qatysty zorlyq-zombylyq bolyp turady. QR Adam quqyqtary jónindegi ýákilge kelip túsetin hattardyń 7,5 paıyzy balalar quqyǵynyń buzylýyna qatysty bolyp keledi. Sonyń ishinde zorlyq-zombylyq qoldaný faktileri boıynsha», - dep atap ótti ol.

Onyń sózine qaraǵanda, adam quqyqtary jónindegi quzyretti organdar Qazaqstandaǵy ıÝNISEF ókildigimen birlese otyryp, sheteldik mamandardy tartý arqyly memlekettik ınternattyq mekemelerde jáne mektepterde balalarǵa qatysty ozbyrlyqty anyqtaý boıynsha keshendi zertteý jasady.

«Ol zertteýden anyqtalǵany, balalardyń 66,3 paıyzy mektepte zorlyqpen kezigip, oǵan kýá bolady nemese ozbyrlyqqa qatysy bar bolyp shyǵady eken. Sonyń ishinde 23 paıyzy jábir kóretindikterin aıtqan. 20 paıyzy - balalar arasyndaǵy bopsalaýdan japa shekse, 27 paıyzy muǵalimderdiń qol júgirtýinen ozbyrlyq kórgen», - dedi Vıacheslav Kalıýjnyı.

Ortalyq basshysynyń sózine qaraǵanda, balalarǵa negizinen ınternat oqytýshylary qol kóteredi jáne ony ózderi qalypty is sanaıdy.

«Internattyq mekemeler qyzmetkerleriniń 40 paıyzy mundaı jazalaý sharalaryn qoldaıtyndyqtaryn jetkizgen», - deıdi sarapshy.

Bul óz kezeginde óz-ózine qol jumsaý faktilerine ákep soqtyrady. Internat tárbıelenýshileriniń 8,5 paıyzy ózderine qol jumsamaq bolǵan.

«Olardyń 75,3 paıyzy ózderine ekinshi ret qol jumsaǵandary da anyqtaldy», - dep túıdi sózin Vıacheslav Kalıýjnyı.