Qazaqstanda araq-sharap ónimderiniń baǵasy qymbattaıdy
Úkimet alkogol ónimine tómengi bólshek saýdadaǵy baǵany joǵarylatýdy qarastyratyn Qaýlysynyń jobasyn qaraýda. Ol boıynsha, araq-sharap ónimderiniń bólshek saýdadaǵy eń tómengi quny 2017 jyly bir lıtrine 1 700 teńge dep belgilengen. Bul týraly QR Ulttyq ekonomıka mınıstrligi «QazAqparat» tilshisiniń resmı saýalyna bergen jaýabynda málim etti.
Mınıstrliktiń xabarlaýynsha, bul sharalar alkogol ónimderin tutyný deńgeıin tómendetý maqsatynda qolǵa alynyp otyr.
Sonymen qatar «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» jańa zań boıynsha, alkogoldik ónimniń 1 lıtri úshin: 2017 jyly - 2 000 teńge, 2018 jyly - 2 275 tenge, 2019 jyly - 2 550 teńgege deıingi aktsızdik mólsherlemeni belgileý kózdelgen. 2016 jylmen salystyrǵanda, ósim - 85 paıyzdy quraıdy.
Al, syra jáne syra sýsyndarynyń 1 lıtri úshin 2017 jyly 39 teńge, 2019 jyly 57 teńgege deıin ósirý kózdelgen.
«Qazaqstanda syra aktsıziniń lıtrine 26 teńge mólsherlemesi 15 jyl boıy, 2000 jyldan beri ózgermegen. Eger araqtyń quramynda árbir 1°S úshin 13,8 teńge aktsız belgilense, syrada 4,8 aktsız qarastyrylǵan bolatyn. Syra aktsızi men araq aktsıziniń ara salmaǵy 2,9-dy quraıtyn. Óz kezeginde syrada ortasha eseppen spırttiń quramy 5,4% bolady. Osyǵan baılanysty, Eýropalyq Odaq elderi tájirıbesine súıenip, aktsız mólsherlemesin sýsyn quramyndaǵy spırttiń úlesine qarap taǵaıyndaý usynyldy», - delingen xabarlamada.
Syra aktsızi mólsherlemesiniń birden 100 paıyzǵa joǵarylaýy (lıtrine 53 teńge) syra óndirýshilerge keri áser etýi múmkin. Onyń ústine Qazaqstan naryǵy Reseı naryǵyna qaraǵanda birshama kishkentaı. Reseı halqy syrany 12 ese kóp tutynatynyn eskeretin bolsaq, bul tipti mardymsyz.
Spırttik sýsyndardyń aktsız mólsherlemelerin arttyrý ishimdikke salynýǵa qarsy tıimdi quraldardyń biri sanalady. Qazaqstanda sońǵy 5 jylda alkogoldik ishimdikterdi tutynýǵa baılanysty dertterdiń sany 25 paıyzǵa azaıǵan (2009 jyly - 320 myń, 2013 jyly - 241 myń adam).