Qazaqstanda araq saýdasy nelikten eki ese artyp ketti

ASTANA. QazAqparat – Elimizdiń naryǵynda araq, konıak jáne spırt saýdasy qyzyp tur. 2022 jyly eldegi dúkenderde 139,9 mln lıtrden astam araq, konıak jáne spırt satylypty. Energyprom.kz resýrsynyń saraptamasynda osyndaı málimet berilgen, dep habarlaıdy QazAqparat tilshisi.

«Bul – eldegi spırttik ishimdikter naryǵynyń statıstıkasyndaǵy absolıýtti rekord. 2021 jylmen salystyrǵanda ishki naryqta spırttik ishimdik satý kólemi 90,4% ósti. Ósim negizinen araq pen lıker-sharap ónimderiniń saýdasy esebinen paıda bolǵan – 44,2 mıllıon lıtrden 90,1 mıllıon lıtrge deıin artqan. Spırt saýdasy da qyzyp, 29,3 mıllıon lıtrge jetti (plıýs 68,1%). Al konıak naryǵynda 20,5 mıllıon lıtr ónim satylǵan (73,5% ósim). Qyzýy joǵary spırtten basqa ishimdik túrlerine degen suranys munshalyqty joǵary bolǵan joq. Sharap satý kólemi 26,9%, shampan satý 28%, syra satý 1,9% azaıǵan», - dep jazylǵan saraptamada.

Maqalada mundaı ósimniń sebebi de aıtylǵan.

«Qazaqstanda alkogolge degen suranystyń osynshalyq artýyn jalǵyz jaıtpen baılanystyrýǵa bolady. Elde qazaqstandyqtarǵa qaraǵanda ásirese araq pen konıakty aıryqsha kóp kólemde tutynatyndardyń sany kúrt ósken. Dúnıejúzilik densaýlyq saqtaý uımynyń dereginshe, reseılikter qazaqstandyqtarǵa qaraǵanda eki ese kóp ishimdik ishedi (jan basyna shaqqandaǵy kórsetkish)», - dep jazady Energyprom.kz.