Qazaqstanda antısemıtızm joq, sonysymen úlgi bola alady - Malkolm Honlaın

NUR-SULTAN. QazAqparat – Álemde jekkórýshilik, qaqtyǵystar men zorlyq-zombylyq belgilerin kórgende únsiz qalmaý kerek. Amerıkanyń iri evreı uıymdary prezıdentteri konferentsııasy tóraǵasynyń atqarýshy orynbasary Malkolm Honlaın osyndaı pikir aıtty, dep habarlaıdy QazAqparat tilshisi.

«Biz ınternettiń qandaı qaýip tóndiretinin kórip otyrmyz. Qazirgi ýaqytta jekkórýshilik, alalaý men jalǵan aqparattyń taralýyna yqpal etip otyr. Árıne, ınternettiń jaǵymdy jaqtary da bar. Alaıda, ujym bolyp sheshý qajet qaýipter de jeterlik. Bilim berý mekemeleri óz tájirıbelerimen bólisýi kerek, bir-birimizdiń tájirıbemizdi úırenýimiz kerek. Dinı kóshbasshylarǵa ne isteý qajettigin túsiný úshin ókilettikter bergen durys. Sabaq alý úshin bilim men ınternet ındýstrııasynyń kólemin taldaý qajet. Jalǵan aqparattyń aldyn alýda mańyzdy ról atqaratyn buqaralyq aqparat quraldary bizge kómektesýi kerek. Durys aqparatty taratýǵa kómektesetin róldik modelderdi tabýymyz mańyzdy. Róldik modelder, eń aldymen din kóshbasshylary bolýy múmkin», - dedi Malkolm Honlaın Álemdik jáne dástúrli dinder lıderleri VII seziniń kezekti sektsııasynda.

Spıker din kóshbasshylaryn jastar jıi tyńdaıtyn reperlermen salystyrdy. Onyń aıtýynsha, shyndyqty kópshilikke jetkizý úshin dinı lıderlerdiń óz mıkrofondary bolǵany jón.

«Meniń oıymsha, biz bir-birimizden kóp nárse úırene alamyz. Biz syndarly dıalog quryp, destrýktıvti kúshterdi oqshaýlaý úshin, destrýktıvti kontent pen jekkórýshilik tilin shekteý úshin bilim berý júıeleri men oqýlyqtarǵa monıtorıng júrgizýimiz kerek. Qazir BAÁ, Marokko ózderiniń oqýlyqtaryn ózgertkenin, sonyń nátıjesinde jekkórýshilikti azaıtqanyn kórip otyrmyz. Jekkórýshilikten arylýymyz kerek. Muny tájirıbe almasý arqyly jasaýǵa bolady jáne Qazaqstan úlgi bola alady. Ekinshi dúnıejúzilik soǵys kezinde Qazaqstan 100 myńnan astam evreıdi jyly qabyldady jáne kóptegen qazaqtar evreılerdiń ómirin saqtap qalý úshin óz basyn qaterge tikti. Qazaqstanda antısemıtızm joq. Bul óńirdegi kórshi elderge de qatysty. Biz Qazaqstannyń úlgisin zertteýimiz kerek, jekkórýshilik, qaqtyǵystar men zorlyq-zombylyq belgilerin kórgende únsiz qalmaý úshin qoldan kelgenniń bárin jasaýymyz kerek. Dinı kóshbasshylar da eshqandaı sıqyrly formýla joq ekenin túsinýi kerek. Jaýapkershilik barlyǵyna júkteledi», - dedi Malkolm Honlaın Sezge qatysýshylarǵa.

Aıta keteıik, búgin elordada Álemdik jáne dástúrli dinder lıderleriniń VII sezi jalǵasyp jatyr. Tústen keıin sezdiń saltanatty jabylý rásimi ótedi.