Qazaqstanda «amfıbııa» áskerı qyzmetshilerdi daıyndaý bastaldy

ASTANA. QazAqparat - Qazaqstannyń Qarýly Kúshterinde amfıbııalyq bólimshelerdi daıyndaý bastaldy, dep habarlaıdy QazAqparat tilshisi Sporttyq komıtet - Armııanyń ortalyq sporttyq klýbynyń baspasóz qyzmetine silteme jasap.

Tuńǵysh ret QR Qorǵanys mınıstrliginiń Armııa ortalyq sport klýbynyń (AOSK) bazasynda sý astyndaǵy bastapqy áskerı daıyndyq kýrstary bastaldy.

Kýrs eki bólikten turady: teorııalyq jáne praktıkalyq (semınarlyq). Áskerı qyzmetshiler daıarlyqtan bir aı ýaqyttyń ishinde ótpek. Oqytý barysynda sý astyndaǵy daıarlyq boıynsha oqytý qurylǵylaryn, jattyǵý quraldaryn, oqytý qarýlary men tehnıkalardy, ýaqyt pen táýlikti barynsha tıimdi qoldaný qarastyrylǵan. 

Kýrstyń aǵa nusqaýshysy - sý astynda júzý boıynsha Qazaqstan Respýblıkasynyń eńbek sińirgen jattyqtyrýshysy Valerıı Vasılev.

Aıta keterligi, oqyp jatqandarmen birge kýrstan Sporttyq komıtettiń tóraǵasy - AOSK bastyǵy polkovnık Rasýl Meıirmanov ta ótip jatyr.

«Osy jyldyń basynda Qazaqstan Respýblıkasy Qorǵanys mınıstrligi basshylyǵynyń bastamasymen Almaty qalasyndaǵy Armııanyń ortalyq sport klýbynyń bazasynda Sýdaǵy daıarlyq ortalyǵy qurylǵan bolatyn. Ortalyqtyń basty mindeti - QR Qarýly Kúshteriniń amfıbııalyq bólimsheleriniń sýdaǵy daıyndyǵyn qamtamasyz etý. Ol boıynsha daǵdyny jetildirý, amfıbııalyq bólimshelerdiń sheberligin shyńdaý bolatyn», - delingen habarlamada.

Kýrsty aıaqtaǵan áskerı qyzmetshilerge «Sý astyndaǵy bastapty daıarlyq kýrsynan ótkeni týraly» sertıfıkat beriledi.