Qazaqstanda amerıkalyq kapıtalmen jumys isteıtin 590-ǵa jýyq kásiporyn bar – Muhtar Tileýberdi

ASTANA. QazAqparat – Qazaqstanda amerıkalyq kapıtaldyń qatysýymen 590-ǵa jýyq kásiporyn jumys isteıdi. Bul týraly búgin elordada ótken «S5+1» formatyndaǵy mınıstrler kezdesýinen keıin BAQ ókilderiniń saýalyna QR Syrtqy ister mınıstri Muhtar Tileýberdi málim etti, dep habarlaıdy QazAqparat tilshisi.

«Qazaqstan men AQSh arasyndaǵy ózara saýda aınalymy 2022 jyly 3 mlrd dollardan asty. Bul kórsetkish aldyńǵy jylmen salystyrǵanda 37,2%-ǵa artyq. Eksport – 1,15 mlrd dollar, al AQSh-tan Qazaqstanǵa ımport – 1,89 mlrd dollarǵa jetti. AQSh – Qazaqstan ekonomıkasyndaǵy eń iri ınvestorlardyń biri. 1993 jyldan beri AQSh-tyń Qazaqstanǵa tikeleı sheteldik ınvestıtsııalarynyń jalpy aǵyny 62 mlrd dollardan asty. Al byltyr alǵashqy úsh toqsanda amerıkalyq ınvestıtsııalardyń kólemi 2021 jyldyń sáıkes kezeńimen salystyrǵanda 58,8%-ǵa, ıaǵnı 5 mlrd dollarǵa deıin ósti. Qazaqstanda amerıkalyq kapıtaldyń qatysýymen 590-ǵa jýyq kásiporyn jumys isteıdi. AQSh kompanııalary Qazaqstan naryǵyna joǵary qyzyǵýshylyq tanytýda», - dedi Muhtar Tileýberdi.

Sonymen qatar baspasóz brıfıngine AQSh-tyń Memlekettik hatshysy Entonı Blınken de qatysty. Ol álemdik máselelerdi sheshýde Qazaqstannyń ózindik erekshe orny bar ekenin atap ótti.

Osyǵan deıin AQSh Memlekettik hatshysy Entonı Blınken Qazaqstanǵa alǵash ret keletinin habarlaǵan edik.

AQSh ókili Qazaqstanǵa kelisimen QR Syrtqy ister mınıstri Muhtar Tileýberdimen kezdesti.

Búgin Prezıdent Qasym-Jomart Toqaev AQSh-tyń Memlekettik hatshysy Entonı Blınkendi qabyldady.