Qazaqstanda Amazon Kuiper jańa spýtnıktik ınterneti qosylady

<p>ASTANA. KAZINFORM — Qazaqstan Ilon Masktiń Starlink ınternetine balama bolatyn Amazon Kuiper spýtnıktik ınternet qyzmetimen kelisimge qol qoıýdy josparlap otyr. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev málim etti.</p>

Aıta keteıik, Astanada tsıfrlyq ınklıýzııa jáne transformatsııa boıynsha Ortalyq Azııadaǵy alǵashqy Azııa-Tynyq muhıty mınıstrler konferentsııasy ótip jatyr. Onyń qorytyndysy boıynsha túrli kelisimderge qol qoıý josparlanǵan.

Tsıfrlyq damý mınıstri eń mańyzdy kelisimderdiń biri Amazon Kuiper ınternet qyzmetimen jasalatynyn aıtty.

«Amazon Kuiper — spýtnıktik ınternet qyzmetin usynatyn spýtnıktik sheshim. Starlink, OneWeb-tiń balamasy. Meniń oıymsha, osy baǵytta básekelestikti damytý arqyly biz azamattar úshin qolaıly baǵada sapaly qyzmetter ala alamyz», — dedi Jaslan Mádıev Astanada tsıfrlyq ınklıýzııa jáne transformatsııa konferentsııasynda.

Ótken jyly Amazon kompanııasy Project Kuiper spýtnıktik ınternet qyzmetterin iske qosý úshin alǵashqy eki ǵarysh spýtnıginiń prototıpterin ushyrdy.

Jalpy Amazon 3200-den astam spýtnıkti orbıtaǵa shyǵarýdy josparlaǵan bolatyn.

Alaıda, jaqynda kompanııa Project Kuiper tolyqqandy toptamasyn iske qosýdy 2024 jyldyń sońyna shegerdi.