Qazaqstanda altyn-valıýta aktıvteri qanshalyqty ulǵaıdy
Altyn baǵasynyń ózgerýi jáne ekinshi deńgeıli bankterdiń valıýtalyq qaldyqtarynyń tómendeýi ótken aıdaǵy rezervter serpininiń negizgi faktorlaryna aınaldy. Geosaıası táýekelderdi iske asyrý qymbat metalǵa suranystyń artýyna basty sebep boldy. Investorlar belgisizdik kezeńinde qashan da senimdi qorǵanysh aktıvi bolyp sanalatyn altynǵa senim artady.
«Aqpan aıynda altynnyń baǵasy bir ýntsııa úshin 1791 dollardan 1903 dollarǵa deıin nemese 6,3%-ǵa ósti. Eń joǵary aýytqý 24 aqpanǵa týra keldi, ol kúni altynnyń baǵasy 2011 jyldan beri alǵash ret 1920 AQSh dollaryn eńserdi. Al naýryz basynda altynnyń quny bir ýntsııa úshin 2000 AQSh dollarynan asyp, bıylǵy 8 naýryzdaǵy jaǵdaı boıynsha 2070 deńgeıine jetti. Esterińizge sala keteıik, altyn-valıýta rezervinde (AVR) altynnyń úlesi úshten ekiden kóbin quraıdy jáne osy úlesti tómendetý aıasynda Ulttyq bank metaldyń qolaıly baǵasy turǵysynda altyn satýdy júzege asyrdy. Aqpannyń sońyndaǵy jaǵdaı boıynsha altyn portfeli 380,2 tonnany qurady», - dedi Á. Moldabekova.
Degenmen, altyn baǵasynyń ósýi men ony satýdyń oń áseri ekinshi deńgeıli bankterdiń Ulttyq banktegi shottarynan valıýtalyq qaldyqtarynyń áketilýimen, sondaı-aq valıýtalyq ınterventsııalar júrgizýmen ishinara teńestirildi.
Sonymen qatar ol Ulttyq qordaǵy valıýta aktıvterine qatysty túsinik berdi.
«Aldyn ala derekter boıynsha, aqpannyń sońynda Ulttyq qordyń valıýtalyq aktıvteri ótken aıda is júzinde ózgermeı, 53,9 mlrd AQSh dollaryn qurady. Ótken aıda 264 mlrd teńgege kepildendirilgen jáne nysanaly transfertterdi bólý maqsatynda valıýta naryǵynda 510 mln AQSh dollary nemese 221 mlrd teńgege aktıvter satyldy. Transfertterdiń bir bóligi teńgelik shottaǵy qaldyqtar men Ulttyq qorǵa túsetin teńgedegi túsimder esebinen qanaǵattandyrylǵanyn atap ótken jón. Bul rette, aqpanda qorǵa túsken valıýtalyq túsimder 1 195 mln AQSh dollaryn qurady», - dedi Á. Moldabekova.
Onyń sózine qaraǵanda, Ulttyq qordyń ınvestıtsııalyq kirisi ótken aıdyń qorytyndysy boıynsha teris qalyptasty jáne (-)657 mln AQSh dollaryn qurady. Aqpan aıynyń qorytyndysy boıynsha, damýshy elder portfeliniń ınvestıtsııalyq kirisi (-)353 mln AQSh dollary bolyp, 6,10%-ǵa tómendedi, aktsııalar portfeliniń ınvestıtsııalyq kirisi (-)344 mln AQSh dollary bolyp, 2,3%-ǵa tómendedi.
Damýshy elderdiń oblıgatsııalar portfelin teris qaıta baǵalaýdyń negizgi sebebi Reseı men Ýkraına arasyndaǵy qaqtyǵystyń shıelenisýi bolyp otyr. Bul rette damyǵan elderdiń aktsııalar naryǵyna qysym – ınflıatsııanyń jedeldeýine jáne AQSh FRJ monetarlyq saıasatynyń kútilgen kúsheıtilýine alyp keldi.