Qazaqstanda altyn óndiretin taǵy bir kásiporyn ashylady

TALDYQORǴAN. QazAqparat - Almaty oblysynyń Sarqan aýdanynda altyn óndiretin fabrıka mamyr aıynda jumysyn bastaıdy. Bul týraly aýdan ákimi Marat Razbekov Óńirlik kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.

Altyn óndiretin kásiporyn Balqash kóliniń jaǵalaýynda ornalaspaq. Jańa jobaǵa 1,6 mlrd teńge ınvestıtsııa tartyldy. Sarqan aýdanynyń ákimi Marat Razbekovtyń aıtýynsha, zaýytqa búgingi kúni barlyq tehnıkalar alynyp, daıyndaq jumystary pysyqtalýda.

«Aýdan ekonomıkasy byltyrǵy jyly qarqyndy damý kórsetkishterine qol jetkizip, birqatar zaýyt iske qosyldy. Ónerkásipti alǵa jyljytý sheńberinde 2019 jylǵa da jobalar óte kóp. Sonyń biri - altyn shyǵarý zaýyty. Ol óz jumysyn bastasa, 60-qa jýyq adam vahtalyq jumyspen qamtylmaq. Qazirgi tańda altynnyń synamalary alyndy, olar zerthanalarda tekserilip, oń nátıjeler kórsetýde» ,- deıdi ol.

Jalpy alǵanda, Sarqan aýdanynyń bıýdjet kirisi 1 mlrd 334 mln teńgeni qurap, byltyrǵy jylmen salystyrǵanda 107 paıyzǵa ósken.

Sondaı-aq aýdan basshysy 2019 jyly atqarylatyn jumystarǵa da toqtalyp ótti. Aýyl sharýashylyǵy boıynsha óndirilgen ónim kólemin 35 mlrd teńgege jetkizý kózdelip otyr. Bıyl 2850 gektarǵa qant qyzylshasy sebiledi. Ónerkásip óndirisiniń kólemin 4 mlrd 90 mln teńgege jetkizilmek.

Kóktem aılarynda Elbasynyń «Uly dalanyń jeti qyry» atty maqalasyna sáıkes Topolevka aýylynda «sıvers» almasynyń gúldenýine arnalǵan festıval uıymdastyrylady.