Qazaqstanda alkogol jáne munaı ónimderi onlaın rejımde qadaǵalanady

ASTANA. QazAqparat - «Ulttyq aqparattyq tehnologııalar» AQ alkogol jáne munaı ónimderin esepteke alýdyń avtomatty júıesiniń iske qosylǵanyn málim etti, dep habarlaıdy QazAqparat.

Taratylǵan málimetken sáıkes, júıege 48 alkogol ónimderin óndirýshi, 3 iri munaı óńdeý zaýyty jáne 15 shaǵyn munaı óńdeý zaýyty qosylǵan.

«Ulttyq aqparattyq tehnologııalar» AQ zaýyttarmen birge júıege derekterdi berý jáne qosý jumystaryn júrgizedi. Qazirgi ýaqytta júıege qosylǵan zaýyttar men nysandar aqparatty esepteýish baqylaý quraldaryna onlaın rejımde beredi. Sondaı-aq, «KazAlko» qaýymdastyǵy, «Qazaqstannyń syra qaınatýshylar odaǵy" ZTB jáne «Kazenergy» qaýymdastyǵy múshelerimen, basqa da óndirýshiler men nysandar jumystar júrgizilýde» - dep atap ótedi «UAT» AQ baspasóz qyzmeti.

Aıta keterligi, burynǵy qoldanystaǵy esepteý júıeleri eskirgen jáne óńdeý  kólemi týraly aqparatty berýdi tıisti deńgeıde qamtamasyz ete almaıdy. Buǵan qosa kún, aı, toqsan jáne jyl boıynsha esepterin qalyptastyrmaǵan, derekter tek ótken 90 kún boıynsha saqtalatyn. Osy protsesti jetildirý maqsatynda jańǵyrtylǵan esepteýish baqylaý quraldary engizildi. Bul quraldar óndiris jáne aınalym kólemderi týraly aqparatty onlaın rejıminde avtomatty túrde berýdi qamtamasyz etedi.

«Astana jáne Almaty qalalarynda, oblys ortalyqtarynda, oblystyq mańyzy bar qalalarda jáne aýdan ortalyqtarynda ornalasqan janar-jaǵarmaı stantsııalaryna esepteýish baqylaý quraldaryn ornatý jumystary 2019 jylǵy 1 qańtarǵa deıin aıaqtaý josparlanǵan», - delingen baspasóz habarlamasynda.