Qazaqstanda alǵash ret jastardyń IT lageri uıymdastyrylady
Joba aıasynda aldymen ótinimder qabyldanady. Al irikteýden ótkender tórt kúndik IT-lagerge joldama alady. Sol jerde olar baǵdarlamalaý, óz jobalaryn iske asyrý, kóshbasshylyq baǵyt jáne kásipkerlik negizderin meńgeredi. Lager aıasynda áleýmettik salaǵa arnalǵan IT jobalar konkýrsy uıymdastyrylady. Sonyń nátıjesi boıynsha úzdik dep tanylǵan jobalar qajetti tehnıkalyq jabdyqtar túrinde granttyq qoldaýǵa ıe bolady. Ár jobaǵa mentor bekitiledi.
Joba ákimshisi Zahıra Begalıevanyń aıtýynsha, múmkindigi shekteýli balalar mektep kezinen bastap oqý oryndarynyń qolaısyzdyǵy, ádistemelik oqýlyqtardyń bolmaýy sııaqty sanalýan kedergilerge tap bolady. Sonyń saldarynan joǵarǵy oqý ornyna túsý jáne jumysqa ornalasý kezinde qıyndyqtar týyndaıdy.
«Teń IT múmkindikter álemi» jastar lageri» - bul kópmodýldi oqytý kýrsy ǵana emes, sonymen qatar IT salasyndaǵy tájirıbe. Baǵdarlamalaý, veb-dızaın, jobalardy basqarý, veb-jasaqtaý, úlken massıvti aqparattarmen jumys isteý, kóshbasshylyq quzyretterin damytý, sheshendik, komanda qurý salasyndaǵy eń úzdik sarapshylardyń dáristerinen turatyn kirispe kýrsy. Baǵdarlamanyń qorytyndysy boıynsha shaǵyn granttar beriledi. Qatysýshylar úshin basty maqsat - Qazaqstannyń barlyq óńirinde múmkindigi shekteýli adamdardyń ómirin jaqsartý úshin óz ıdeıalaryn qalyptastyrý jáne júzege asyrý. «Teń IT múmkindikter álemi» jastar lageri» jobasynyń eń úzdik túlekteri joba seriktesteriniń birine jumysqa ornalasý múmkindigine ıe bolady», - dedi Z.Begalıeva Astanada ótken baspasóz máslıxatynda.
Atalǵan bastamanyń seriktesteri - «Erekshe Tańdaý Shelek» korporatıvtik qory men «Samruk-Kazyna Trust» qory. Jobanyń áleýmettik jelidegi xeshtegi - #ITeachMe.