Qazaqstanda alǵash ret veterınarııa qyzmetkerleri kúni atalyp ótedi
Jańa mereke janýarlardyń densaýlyǵy men janýarlardan alynatyn ónimderdiń qaýipsizdigin qamtamasyz etýge baǵa jetpes úles qosatyn veterınarlyq mamandardyń eńbeginiń mańyzdylyǵyn atap ótýge arnalǵan.
Sońǵy onjyldyqta Qazaqstan Respýblıkasynyń veterınarııa qyzmeti veterınarııa jáne tamaq ónimderi salasyndaǵy tıimdilik pen qaýipsizdikti arttyrýǵa baǵyttalǵan eleýli ózgeristerden ótti. 2011 jyly qurylǵan QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti osy saladaǵy qyzmetti retteıtin jáne baqylaıtyn negizgi organǵa aınaldy.
Qazaqstannyń veterınarııalyq qyzmeti AShM Veterınarııalyq baqylaý jáne qadaǵalaý komıtetinen, óńirlik jáne aýdandyq ınspektsııalardan, respýblıkalyq epızootııaǵa qarsy jasaqtan, respýblıkalyq veterınarııalyq zerthanadan, Veterınarııa jónindegi ulttyq referenttik ortalyqtan, sondaı-aq oblystyq veterınarııa basqarmalarynan, veterınarııalyq stantsııalar men pýnktterden turatyn jergilikti atqarýshy organdardan turady.
Komıtet 17 oblysta jáne respýblıkalyq mańyzy bar 3 qalada aýmaqtyq ınspektsııalardy, sondaı-aq 203 aýdandyq veterınarııalyq stantsııalardy, 2 334 aýyldyq okrýgterdegi veterınarııalyq pýnktterdi qamtıdy. Bul aýyldyq okrýgterden bastap respýblıkalyq deńgeıge deıin barlyq deńgeıde baqylaý men qadaǵalaýdy qamtamasyz etýge múmkindik beredi.
Veterınarııalyq baqylaý jáne qadaǵalaý komıtetiniń negizgi mindetteri - janýarlardy aýrýlardan qorǵaý, halyqtyń densaýlyǵyn saqtaý, veterınarııalyq-sanıtarııalyq qaýipsizdikti qamtamasyz etý jáne qorshaǵan ortanyń lastanýyn boldyrmaý. Veterınarııalyq preparattar men jemshóptiń qaýipsizdigi men sapasyn baqylaý qyzmettiń mańyzdy baǵyty bolyp sanalady.
Mereke qarsańynda Veterınarııalyq baqylaý jáne qadaǵalaý komıteti respýblıka boıynsha óziniń aýmaqtyq ınspektsııalarymen birlese otyryp, halyqtyń veterınarııalyq qaýipsizdik týraly bilimin arttyrýǵa baǵyttalǵan aýqymdy sharalar uıymdastyrdy.
Atap aıtqanda, iri saýda oryndarynda, kedendik resimdeý ortalyqtarynda, halyqaralyq áýejaılarda janýarlardyń asa qaýipti aýrýlarynyń aldyn alý, aýyl sharýashylyǵy janýarlaryn birdeılendirý, veterınarlyq-sanıtarlyq talaptar boıynsha keńester ótkizildi.
Komıtettiń vedomstvolyq baǵynysty uıymdary veterınarlyq jáne ǵylymı qyzmetterdiń, Densaýlyq saqtaý mınıstrliginiń jáne halyqaralyq uıymdardyń ókilderi úshin Ashyq esik kúnin ótkizdi, shara barysynda zerthanalardyń, arnaıy mashınalardyń jumys protsesin kórsetti, oqý-ádistemelik ortalyqtyń qyzmetimen tanystyrdy.