Qazaqstanda alǵash ret tennısten álem chempıonatynyń irikteý saıystary ótedi

ASTANA. QazAqparat – Shymkent qalasynda 1-13 mamyr kúnderi 16 jasqa deıingiler arasynda tennısten álem chempıonatynyń irikteý saıystary ótedi, dep habarlaıdy QazAqparat tilshisi.

Qazaqstan tennıs federatsııasynyń baspasóz qyzmetinen málim etkenindeı, elimizde alǵash ret uıymdastyrylyp otyrǵan jarysta Azııa - Tynyq muhıt aımaǵynyń jasóspirimderi baq synaıdy.

Álem chempıonatyna joldama úshin qyzdar arasynda Qazaqstan, Aýstralııa, Taıbeı, Gonkong, Úndistan, Indonezııa, Malaızııa, Iran, Japonııa, Ońtústik Koreıa, Qyrǵyzstan, Mońǵolııa, Jańa Zelandııa, Taıland, Ózbekstan, Vetnam quramalary kortqa shyǵady.

Bozbalalar arasynda Qazaqstan, Aýstralııa, Malaızııa, Pákstan, Sıngapýr, Taıbeı, Gonkong, Úndistan, Indonezııa, Iran, Japonııa, Ońtústik Koreıa, Jańa Zelandııa, Taıland, Ózbekstan, Vetnam komandalary synǵa túsedi.

Qazaqstan namysyn myna sportshylar qorǵaıdy:

Bozbalalar:

1. Ámir Omarhanov (Qaraǵandy)

2. Zańǵar Nurlanuly (Túrkistan).

Úshinshi bos orynǵa Damır Jalǵasbaı (Almaty), Baqtııar Erasyl (Astana) jáne Artem Sıdorov (Almaty) talasady.

Qyzdar:

1. Іńkár Dúısebaı (Almaty)

2. Polına Sleptsova (Almaty)

3. Arıana Gogýlına (Astana)

4. Anastasııa Krymkova (Taraz).

Osylardyń ishinen komanda kapıtany úsheýin tańdaıdy.

Shymkenttegi irikteý saıysynda 16 komanda tórt topqa bólinedi. Ár toptan eki úzdik qurama pleı-off kezeńine shyǵyp, álem chempıonatynyń joldamasyn sarapqa salady. Azııa - Tynyq muhıt aımaǵynan bozbalalar arasynda álem chempıonatyna tórt joldama beriledi, ıaǵnı jartylaı fınalǵa shyqqan komandalar álem birinshiligine joldama alady. Qyzdar arasynda úsh joldamaǵa úzdik úshtikke engender ıe bolady.

Shymkentpen qatar, Eýropa, Afrıka, Ońtústik, Soltústik jáne Ortalyq Amerıkada irikteý jarystary ótip, álem chempıonatyna baratyn 16 komanda anyqtalady.

Eske sala keteıik, budan buryn Elena Rybakınanyń Shtýtgart týrnırin jeńispen bastaǵanyn jazǵan edik.