Qazaqstanda alǵash ret skı-alpınızmnen el birinshiligi ótedi

<p>ALMATY. KAZINFORM &ndash; 30 qarasha jáne 1 jeltoqsan kúnderi elimizde alǵash ret skı-alpınızmnen Qazaqstan chempıonaty ótedi.</p>

Bul sport túrinen alǵashqy el birinshiligi Almaty qalasynyń «Shymbulaq» taý kýrortyna ótpek. Qazaqstan chempıonatyndaǵy jarystar eki baǵyt boıynsha uıymdastyrylady. 30 qarasha kúni sportshylar «Vertıkaldy jarys» formatynda, 1 jeltoqsanda «Sprınt» baǵytynda ótedi. Jarysqa Shymkent, Óskemen, Petropavl, Aqmola oblysy, Qaraǵandy, Almaty jáne Almaty oblysynyń sportshylary qatysady.

Aıta ketken jón, skı-alpınızm – shańǵy arqyly taýǵa jyldamdyqpen kóterilý jáne jyldamdyqpen túsý elementterin biriktiretin sport túri. 2021 jyldan bastap sport olımpıadalyq sport túrleri tizimine engen. Al 2024 jyly skı-alpınızm nemese skımo Qazaqstannyń sport túrleri tizilimine engizildi.

Qazaqstan chempıonatynyń nátıjesi boıynsha bul sport túrinen eldiń ulttyq quramasy jasaqtalady. Jańadan qurylǵan komanda 2025 jyldyń aqpanynda Harbın qalasyndaǵy qysqy Azııa oıyndarynda baq synaıdy.

Eske salaıyq, buǵan deıin qysqy Azııa oıyndaryna Qazaqstannan 139 sportshy qatysatynyn jazǵan edik.