Qazaqstanda alǵash ret robototehnıkadan chempıonat ótip jatyr

ALMATY. QazAqparat - Almatyda robototehnıka boıynsha «IITU Robocon 2019» chempıonaty ashyldy. Jarysta Qazaqstannyń túkpir-túkpirindegi JOO stýdentterinen quralǵan 15 komanda baq synap jatyr, dep habarlaıdy QazAqparat tilshisi.

Bul chempıonat bıylǵy jastar jyly taqyrybyna oraı «Tsıfrlyq Qazaqstan», «Rýhanı jańǵyrý» baǵdarlamalary aıasynda Almaty qalasy ákimdigi men QR Bilim jáne Ǵylym mınıstrliginiń qoldaýymen ótkizilip jatyr.

«IITU Robocon 2019» chempıonaty - Arduino platformasynyń bazasynda ótkiziletin robototehnıka komandalary arasyndaǵy jarys. Ol jas ǵalymdarǵa robot qurastyrý jáne mehanıka, odan keıin elektronıkadan bastap robottyń ıntellekt baǵdarlamasyn jazýǵa múmkindik beredi.

«Munda eń myqty komandalar jınaldy. Barlyǵy chempıon bolýǵa laıyq. Bizdiń memleket úshin osyndaı sharalardy ótkizý, ásirese «Tsıfrlyq Qazaqstan» baǵdarlamasy aıasynda óte mańyzdy», - dedi Halyqaralyq IT-ýnıversıtetiniń prorektory Medet Turǵambaev.

Uıymdastyrýshylar chempıonatty robototehnıka salasynda jastardyń bilimin tereńdetý úshin uıymdastyryp jatqanyn aıtty.

«Biz jas ǵalymdarda shyǵarmashylyq erkindik bolǵanyn qalaımyz. Olar óz ıdeıalaryn aıtýdan qoryqpaýy kerek. Biz olardan bir ónim jasaýdy talap etpeımiz. Bolashaqta olardyń startap jobalaryn qoldaýdy maqsat etip otyrmyz», - dedi QR Tuńǵysh prezıdenti qorynyń qyzmetkeri Janar Temirbekova.