Qazaqstanda áleýmettik jelini qoldaný saýattylyǵyn arttyrý kýrsyn uıymdastyrý usynyldy

NUR-SULTAN. QazAqparat – Qazaqstanda áleýmettik jelini qoldanýshylardyń saýattylyǵy men mádenıetin arttyrý qajet. Bul pikirdi QR Parlamenti Májilisiniń depýtaty Erlan Saırov alǵa tartty, dep habarlaıdy QazAqparat tilshisi.

«Meniń oıymsha, elimizde aldymen áleýmettik jelide retteý kerek. Jáne halyqtyń ony qoldaný mádenıetin kóterý qajet. Múmkin, halyqtyń áleýmettik jelini qoldaný saýattylyǵyn arttyrý úshin tegin kýrs uıymdastyrý kerek shyǵar. Búginde áleýmettik jelini barlyq adam qoldanady. Jáne olardyń jýrnalıstıkaǵa qatysy bar, sebebi olar jelide otyryp aqparat tarata alady. Árıne ár adam áleýmettik jelini qoldanýǵa jáne jelide óz pikiri men azamattyq pozıtsııasyn bildirýge quqyly. Al jelidegi sol jazbanyń zańdylyǵy men rastyǵy, ádeptiligi pen ádilettiligi ol basqa másele. Osy oraıda azamattardyń jelini qoldaný saýattylyǵy men mádenıetin kóterý kerek», - dedi Erlan Saırov elordada ótip jatqan «Astana Media Week – 2021» medıa aptalyǵy barysynda.

Halyq qalaýlysynyń aıtýynsha, elimizde áleýmettik jelini qoldanýdy júıeleý qajet.

«Múmkin áleýmettik jelini qoldanýdyń kodeksin ázirleý kerek shyǵar. Ol kópshilikke túsinikti jáne bılik pen qoǵam úshin tıimdi bolýy tıis», - deıdi ol.

Buǵan deıin habarlaǵanymyzdaı, QR Aqparat jáne qoǵamdyq damý mınıstri Aıda Balaeva áleýmettik ótkir taqyryptardy taratýda tilshilerdiń qoǵam aldyndaǵy jaýapkershiligi týraly sóz qozǵady.

Odan bólek, mınıstr elimizde salalyq jýrnalıstıkany damytýǵa asa mán berilip jatqanyn tilge tıek etti.