Qazaqstanda áleýmettik jelilerdiń buǵattalýy múmkin be

NUR-SULTAN. QazAqparat – Qazaqstandyqtar úshin áleýmettik jelilerdi buǵattaý qaýpi bar ma? Atalǵan máselege qatysty QR Parlamenti Májilisiniń depýtaty Aıdos Sarym óz oıyn bildirdi, dep habarlaıdy QazAqparat tilshisi.

«Qazaqstanda áleýmettik jeli degen jaqsy bir qural. Biraz adamdar áleýmettik jeli arqyly nápaqa taýyp otyr. Keıbir adamdar sol arqyly ózin tanymal etip jatyr, al bireýler ol ermek. Bir ǵana Instagram-nyń ózinde 8 mln adam otyr. Elde aýqymdy reformalar júrip, tańdaý júrip jatqan kezde eshbir esi durys saıasatker áleýmettik jelini buǵattaýǵa barmaıdy. Ony buǵattaýǵa jol bermeıdi», - dedi Aıdos Sarym elimizge tanymal jýrnalıst Búbigúl Jeksenbaıǵa bergen suhbatynda.

Onyń aıtýynsha, el Úkimetiniń áleýmettik jelidegi dúnıeni jeke dara alyp tastaıtyn esh múmkindigi joq.

«Ol múmkindik kompanııa ıelerine tıesili. Ár áleýmettik jeliniń óz talaby men zańy bar. Bizdiń Úkimet nemese sot sol áleýmettik jeli talabyna kereǵar kontent týraly eskerte alady. Elimizde sońǵy bolyp jatqan oqıǵalar dástúrli medıaǵa degen suranysty arttyratyn sııaqty. Facebook, Instagram-nyń da ýaqyty ótedi. Mysaly, qazir eldiń birazy Tik-Tok-qa yǵysyp jatyr. Bul básekelestik orta, áli talaı jańa dúnıe shyǵar», - deıdi ol.

Buǵan deıin halyq qalaýlysy kıberbýllıng máselesi týraly oıyn ortaǵa salǵan edi.