Qazaqstanda áleýmettik jeliler ýaqytsha istemeýi múmkin

ASTANA. QazAqparat - Qazaqstanda áleýmettik jeliler men messendjerlerdiń jumysynda kidiris bolatyndyǵy jóninde eskertildi, dep habarlaıdy «QazAqparat» HAA QR Aqparat jáne kommýnıkatsııalar mınıstrligine silteme jasap.

«Esil aýdandyq sotynyń ekstremıstik uıym dep tanylǵan «Qazaqstannyń demokratııalyq tańdaýy» qozǵalysyn qoldaýǵa baǵyttalǵan aqparat materıaldaryn taratýǵa tyıym salý jónindegi sheshimin oryndaý aıasynda Qazaqstan Respýblıkasynyń Aqparat jáne kommýnıkatsııalar mınıstrligi tyıym salynǵan materıaldar taralyp jatqan sheteldik áleýmettik jeliler men messendjerlerdiń ıelerine tıisti habarlamalar jiberildi.

Sonymen qatar sottyń sheshimin oryndaý úshin quzyrly organdar zańǵa qaıshy materıaldardy óshirý boıynsha tehnıkalyq jumystar júrgizip jatyr. Osyǵan oraı keıbir áleýmettik jeliler men messendjerlerdiń (Telegram) jumysynda tehnıkalyq kidirister bolýy múmkin», - dep málimdedi vedomstvonyń baspasóz qyzmeti.