Qazaqstanda áleýmettik mańyzy bar azyq-túlik taýarlaryna shekti baǵalar engizildi

NUR-SULTAN. QazAqparat - QR Saýda jáne ıntegratsııa, Aýyl sharýashylyǵy, Ulttyq ekonomıka mınıstrlikteri Qazaqstan Respýblıkasynda tótenshe jaǵdaı kezinde «Áleýmettik mańyzy bar azyq-túlik taýarlaryna shekti bólshek saýda baǵasyn engizý týraly» birlesken buıryqqa qol qoıdy, dep habarlaıdy QazAqparat tilshisi.

Elimizdiń Saýda mınıstrliginiń dereginshe, búgingi kúnnen bastap mynadaı taýarlarǵa shekti baǵalar belgilendi: 1) birinshi sortty bıdaı uny, 2) birinshi sortty unnan jasalǵan bıdaı nany (pishindi), 3) makaron ónimderi (ólshenip salynatyn), 4) qaraqumyq jarmasy (dán, ólshenip salynatyn), 5) tazartylǵan kúrish (domalaq dándi, ólshenip salynatyn), 6) sıyr eti (súıekti jaýyryn-tós bóligi), 7) taýyq jumyrtqasy (I sanatty), 8) kúnbaǵys maıy, 9) as tuzy («ekstra»-dan basqa).

«Sońǵy aıda Qazaqstannyń azyq-túlik taýarlaryna degen suranysyn taldaý nátıjesinde bul taýarlar eń kóp satyp alynatyny anyqtaldy. Soǵan baılanysty, osy jyldyń basynan bastap dál sol azyq-túlik baǵasy ósti. Baǵalar ár aımaqqa jeke belgilenedi. Nur-Sultan qalasynda 1-shi surypty unnan 1 keli nan eń kóp degende 150 teńge, Almatyda – 146 teńge, Shymkent qalasynda – 146 teńge turatyn bolady. Óńirlerde: Mańǵystaý oblysynda – bir keli nan úshin 164 teńge, Aqtóbe oblysynda – 147, Atyraý oblysynda – 164, Aqmola oblysynda – 160, Qostanaı oblysynda – 139, Qyzylorda oblysynda – 143, BQO – 160, ShQO – 150, Pavlodar oblysynda – 161, SQO – 120, Almaty oblysynda – 144, Jambyl oblysynda – 138, Túrkistan oblysynda – 148. Qaraǵandy oblysynda shekti baǵalar eldi mekenderge baılanysty belgilengen. Onda 1 kg nannyń quny 142 teńgeden 160 teńgege deıin», - dep atap ótedi mınıstrlikten.

Vedomstvonyń atap ótýinshe, baǵa bir keli nan úshin belgilengen. Biraq, bir bólke nan – 550 gramm. Osylaısha, nan bólkesiniń quny, mysaly, Nur-Sultan qalasynda – 82,5 teńgeden, Almaty jáne Shymkent qalalarynda – 80,3 teńgeden aspaıdy.

Áleýmettik mańyzy bar azyq-túlik taýarlaryna ruqsat etilgen shekti bólshek saýda baǵalarynyń mólsherin arttyrý 265 100 teńgeden 530 200 teńgege deıin aıyppul túrinde jazaǵa ákep soǵady.