Qazaqstanda áleýmettik mańyzy bar azyq-túlik qory jetkilikti me - Saparhan Omarovtyń jaýaby
«Memleket basshysynyń tapsyrmasymen Aýyl sharýashylyǵy mınıstrligi Saýda jáne ıntegratsııa mınıstrligimen, ákimdiktermen birge búgingi tańda jedel shtab qurdy. Shtabtyń negizgi maqsaty – halyqty negizgi azyq-túlik túrlerimen qamtamayz etý. Ákimdiktermen qazir turaqty baılanysta otyrmyz. Negizinen aımaqtardaǵy turaqtandyrý qorlaryndaǵy azyq-túliktiń tolymdylyǵyna, óndirýshilerdiń qoımalaryna, saýda núktelerine monıtorıng júrgizilýde. Qolda bar jedel málimetke sáıkes qazirgi tańda respýblıkada 1,2 mln tonna áleýmettik mańyzy bar taýar bar», - dedi Saparhan Omarov OKQ-da ótken baspasóz máslıhatynda.
Aýyl sharýashylyǵy mınıstriniń aıtýyna qaraǵanda áleýmettik mańyzy bar taýardyń bul kólemi halyqty 5-6 aı kóleminde qamtamasyz etýge tolyǵymen jetkilikti.
«Bul tek qor ǵana. Odan bólek azyq-túliktiń barlyq túri óndirilip te jatyr. Óńdeýge baǵyttalatyn shıkizat qor barshylyq. Óńdeýshi kásiporyndar qajet bolǵan jaǵdaıda óndiristik qýattylyqty arttyrady», - dedi ol.
Saparhan Omarov qajettilik qazirgi tańda 80 paıyzǵa, al azyq-túliktiń keıbir túri boıynsha 100 paıyzǵa tolyq ekenin jetkizdi.
«Bizdiń negizgi azyq-túlik túrleri – bıdaı uny. Bıdaı unynan úsh mıllıon tonna óndirdik. Bul ishki qajettilikti 204 paıyzdyq deńgeıde jabýǵa jetkilikti. 144 myń tonna kúrish óndirildi. Al qajettilik mólsheri – 76 myń tonna. 190 paıyzǵa jaýyp otyrmyz. Sol sekildi 165 myń tonna makaron óndirilýde. Qajettilik – 150 myń tonna. 3,9 mıllıon tonna kartop óndirýdemiz. Іshki qajettilik kartop boıynsha 107 paıyzǵa jabylǵan. Sıyr, qoı, jylqy, shoshqa eti jaǵynan ýaıym joq», - dedi ol.
Eske sala ketsek buǵan deıin atalmysh baspasóz máslıhatynda Saýda jáne ıntegratsııa mınıstri Baqyt Sultanov koronavırýs ınfektsııasyna baılanysty sýpermarketter men bazarlarda týyndaǵan dúrbeleńge baılanysty qazaqstandyqtardy sabyrǵa shaqyrǵan bolatyn.