Qazaqstanda áleýmettik mańyzy bar azyq-túlik baǵasy 18,6%-ǵa deıin ósti
«Azyq-túlik taýarlary ınflıatsııaǵa eń kóp úles qosty, olardyń ósýi 10 %-dan 15,4 %-ǵa deıin jedeldedi. Oramjapyraq, qant, kartop, qyzanaq baǵalarynyń aıtarlyqtaı ósýi baıqaldy. Naýryzdyń tórtinshi aptasynyń qorytyndysy boıynsha áleýmettik mańyzy bar azyq-túlik taýarlarynyń baǵasy jyldyq kórsetýde 18,6 %-ǵa deıin ósken. Bul ósýge naýryzdyń ekinshi aptasynda jekelegen azyq-túlik taýarlaryna suranystyń artýy aıtarlyqtaı úles qosty. Áleýmettik mańyzy bar azyq-túlik taýarlary baǵasynyń aptalyq ósýi naýryzdyń sońǵy aptasynda – 1,3 %, sáýirdiń birinshi aptasynda 0,9 % bolyp, turaqtanyp keledi», - dedi Ulttyq bank tóraǵasy Úkimettiń búgingi otyrysynda.
Onyń aıtýynsha, azyq-túlikke jatpaıtyn taýarlar baǵasy naýryzda 8,6 %-dan 10,9 %-ǵa deıin qymbattady. Oǵan teńge baǵamynyń álsireýi jáne azyq-túlikke qaraǵanda tómenirek bolsa da, artyq suranystyń qysymy sebep boldy.
Aqyly qyzmet kórsetý baǵasy 7,1 %-dan 8,3 %-ǵa deıin jedeldedi, bul birqatar naryqtyq qyzmetter baǵasynyń ósýine baılanysty boldy.
«Proınflıatsııalyq táýekelderdiń kúsheıýin eskere otyryp, ınflıatsııa boljamy ósý jaǵyna qaraı qaıta qaralýda. Úkimet pen jergilikti atqarýshy organdar baǵanyń maýsymdyq ósýine jol bermeı, aldyn alý sharalaryn qabyldaýy qajet. Óńirlerdiń qajettilikterin eskere otyryp, óńiraralyq aǵyndardy ýaqytyly uıymdastyryp, eldi áleýmettik mańyzy bar azyq-túlik taýarlarymen qamtamasyz etý máselesin turaqty baqylaý mańyzdy. Baǵanyń negizsiz ósýine jol bermeý úshin baǵa ústemesine tıimdi baqylaý júrgizý qajet», - dedi Ǵalymjan Pirmatov.