Qazaqstanda áleýmettik mańyzdy saýda alańdaryndaǵy baǵa deńgeıi tekseriledi

NUR-SULTAN. QazAqparat – Áleýmettik mańyzy bar taýar naryqtary boıynsha tekserý is-sharalarynyń jańa qadamdary bastaldy. Bul týraly Úkimet otyrysynda Básekelestikti qorǵaý jáne damytý agenttiginiń tóraǵasy Serik Jumanǵarın aıtty, dep habarlaıdy QazAqparat tilshisi.

«Agenttik barlyq áleýmettik mańyzy bar taýar naryqtary boıynsha tekserý is-sharalarynyń jańa kesheni bastalǵanyn habarlaıdy. Áleýmettik mańyzy bar azyq-túlik taýarlary, janar-jaǵarmaı jáne qurylys materıaldary naryqtarynan basqa, bul - uıaly baılanys, ınternet qyzmetteri, dárilik zattar, medıtsınalyq buıymdar, zerthana qyzmetteri, turǵyn úı-kommýnaldyq sharýashylyq, domofondar, lıft, basqarýshy kompanııalar, bıllıngtik qyzmetter naryqtary. Tólem uıymdary qyzmetteriniń baǵalaryn, ásirese kommýnaldyq qyzmetterge, memlekettik monopolııalar qyzmetterine, memlekettik jáne jekeshe operatorlardyń qyzmetterine aqsha aýdarý kezinde tómendetý boıynsha sharalar qabyldanatyn bolady», - dedi S. Jumanǵarın.

Onyń aıtýynsha, shaǵymdardyń kóptigine baılanysty, munaı ónimderin, suıytylǵan gaz, elektr energııasyn ótkizý kezinde taýar bırjalaryn qosa alǵanda, barlyq mańyzdy jumys istep turǵan saýda alańdary baǵalyq sóz baılasý jáne saýda-sattyqqa qol jetkizýdi shekteý turǵysynan tekseriledi.

«Osylaısha, halyq úshin barlyq mańyzdy taýar naryqtarynda baǵalardy keshendi tómendetý jumystary jalǵastyrylatyn bolady», - dedi agenttik basshysy.