Qazaqstanda áktas, gıps jáne boıaý arzandady

NUR-SULTAN. QazAqparat - Qazaqstanda 2019 jyldyń maýsymynda qurylystaǵy baǵalar 2018 jyldyń jeltoqsanymen salystyrǵanda 0,7%-ǵa, qańtar-maýsymda 0,1%-ǵa artqan, dep habarlaıdy QazAqparat QR Ulttyq ekonomıka mınıstrligi Statıstıka komıtetine silteme jasap.

Bıyl maýsymda ótken jyldyń jeltoqsanymen salystyrǵanda qurylys-montajdyq jumystarǵa baǵa 0,3%-ǵa tómendese, mashına men qural-jabdyqtarǵa 3,2%-ǵa artqan. Al, basqa da jumystar men shyǵyndarǵa 2,7%-ǵa qymbattaǵan. 2019 jyldyń birinshi toqsanynda 2018 jyldyń osy toqsanymen salystyrǵanda sáıkesinshe 2,1%, 1,7% jáne 4,3%-ǵa joǵarylaǵan.

Jyl basynan beri qurylys uıymdary satyp alǵan materıaldar, bólshekter men qurylymdar baǵasy 0,5%-ǵa qymbattaǵan. Keramıkalyq plıtkalar men plıtalar 4,5%-ǵa, tsement - 3,4% -ǵa, shaǵyl - 2,3%-ǵa, qum -1,3%, qıyrshyq tas baǵasy - 1%-ǵa artty. Áktas pen gıps quny 5,9%-ǵa, boıaýlar men emaldar 4,2%, qurylys eritindileri - 2,9%-ǵa, laktar - 1,3%-ǵa arzandady.