Qazaqstanda AQSh, Japonııadaǵydaı «jasyl» bilim berý kampýstary qurylmaq

NUR-SULTAN. QazAqparat - Qazaqstanda AQSh, Japonııadaǵydaı «jasyl» bilim berý kampýstary qurylady. Bul týraly búgin XII AEF aıasyndaǵy «Jasyl ósim úshin ınnovatsııalyq ekojúıeni qurý. Ǵylym, bilim jáne tehnologııa» sessııasynda QR Premer-Mınıstriniń orynbasary Gúlshara Ábdiqalyqova aıtty, dep habarlaıdy QazAqparat tilshisi.

"Jasyl kásibı bilim berý turaqty damýǵa septigin tıgizetin ekonomıkalyq, ekologııalyq jáne áleýmettik aspektileri qamtýy tıis", - dep atap ótti Úkimet basshysynyń orynbasary.

Osy oraıda vıtse-premer kásibı bilim berý úshin sharty túrde jasyl kampýs, turaqty damýdyń sýbektisi retindegi jasyl oqý oryndarynyń yqpaldasýy mańyzdy ekendigin basa aıtty.

"Qazirgi ýaqytta jasyl kampýstar qurý ıdeıasy damyp kele jatyr. Onyń mıssııasy fakýltetterdiń ómirlik tynys-tirshiligine osyndaı tájirıbeleri engizý jáne kórsetý arqyly turaqty damý ustanymdarynan taımaý qajettigine túrli aýdıtorııanyń nazaryn aýdarý sanalady. Mundaı baǵdarlama AQSh, Ulybrıtanııa, Danııa, Shveıtsarııa, Avstralııa, Qytaı, Japonııa jáne Qytaıda jemisti júzege asyrylýda", - dedi ol.

Aıta keterligi, osy sessııa barysynda Qazaqstannyń ekologııalyq uıymdary qaýymdastyǵy tóralqasynyń tóraǵasy Álııa Nazarbaeva ekologtardy daıyndaý reformasyn jedeldetý qajettigin aıtqan bolatyn.

«Kásibı kadrlardy daıyndaý júıesindegi sapalyq reformalar protsesin jedeldetip, ekologııalyq qaýipsizdik pen laıyqty eńbek sharttaryn qurýǵa basymdyq bere otyryp, úkimet, jumys berýshi, eńbek bırjasy, sonymen qatar fılantroptardyń kelisilgen is-áreketin túzý qajet dep sanaımyn. Bul energııamen shıkizatty paıdalaný tıimdiligin arttyrýǵa, parnıkti gazdar shyǵaryndylaryn shekteýge,  qorshaǵan ortaǵa qoqystar men las zattardyń shyǵýyn azaıtýǵa, ekojúıeni qorǵap, qalpyna keltirýge alyp keledi», - dedi Álııa Nazarbaeva.